Коронавируст халдварын цар тахлаас урьдчилан сэргийлэх, тэмцэх, нийгэм, эдийн засагт үзүүлэх сөрөг нөлөөллийг бууруулах тухай хуулийн биелэлтийг хэлэлцэх, дүгнэлт гаргах УИХ-ын түр хороо хуралдаж байна.

Энэ үеэр гишүүд асуулт асууж, хариулт авч байна. 

УИХ-ын гишүүн Х.Болорчулуун "Коронавирус анх Уханьд гарахдаа нэлээд хүнд хэлбэрээр илэрч байсан гэдэг мэдээлэл авч байсан. Энэ тахал уу уу ханиад уу гэдгийг Эрүүл мэндийг сайдаас тодруулмаар байна" гэлээ.

Харин Эрүүл мэндийн сайд Т.Мөнхсайхан "Вирус мутацид орж байгаа тохиолдол олон улсад бүртгэгдэж байгаа. Ер нь нийт өвчилж байгаа тохиолдлын 80 хувь нь хөнгөн хэлбэрээр тусаж байна. Мөн манай улс эрт илрүүлэлт хийж, эмнэлгийн тусламж үйлчилгээ үзүүлж байгаа учраас хөнгөн тусаж байгаа. 

Түүнчлэн дархлаа тогтолцооны хувьд хүн бүр газар орон, идэж ууж байгаа зүйлээсээ шалтгаалан өөр өөр байдаг. Энэ дээр манай улсын онцлогтой зүйлүүд байх талтай" хэмээн хариуллаа. 

Мөн тэрээр үргэлжлүүлэн “Сэлэнгэ аймагт коронавирусийн тохиолдлын тоо нэмэгдсээр байгаа. Сэлэнгэ аймагт 82, 90 настай хүн халдвар авсан нь тогтоогдсон. Өндөр настай хүмүүсийн биеийн байдал хүндрэх байдал ажиглагдаж байна.

Дахиж шинээр голомтууд бүртгэгдвэл хатуу хөл хорионы дэглэм цааш үргэлжилнэ. Шинээр голомтолсон хэлбэрүүд бүртгэгдэхгүй бол хөл хорионы дэглэмээ дөрвөн үе шаттайгаар авна гэж үзэж байгаа. 

Шинээр бүртгэгдэж байгаа голомтын тоо, халдварлалтын дайралтын хүч, тохиолдлын байдлаар авч байгаа шинжилгээний тоо зэргийг харгалзаж үзэж байж шийдвэр гаргана” гэлээ.