Эрүүл мэндийн яамнаас коронавируст халдварын нөхцөл байдлын талаар ээлжит мэдээллээ хийлээ. Өнөөдөр өглөөний /2020.11.22/ 11.00 цагийн байдлаар/ Монгол Улсад коронавирусийн халдварын тохиолдол 26-гаар нэмэгдэж, 608 болсон байна.
Үүнээс:
- Эдгэрсэн- 337
- Эмчлэгдэж байгаа- 264
- Нутаг буцсан- 7 хүн байна.
Одоогийн байдлаар нийслэл хот болон таван аймагт халдварын голомт бүртгэгдээд байгаа. Хариу арга хэмжээг хурдан аваагүй бол коронавирусийн халдварын тохиолдол 4-5 дахин нэмэгдэх байсан тухай ЭМЯ-ны хэлтсийн дарга Д.Нарангэрэл мэдээллээ. Дэлхийн дахинд сүүлийн 24 цагийн хугацаанд 640 мянган хүн шинээр коронавирусийн халдвар авсан нь коронавируст халдвар бүртгэгдсэнээс хойших хамгийн олон хүний халдвар авсан өдөр болсон байна. Энэ нь өмнөх өдрөөс 20 гаруй мянган хүнээр нэмэгдсэн үзүүлэлт болжээ.
ХӨСҮТ-ийн Тандалт, судалгааны албаны дарга А.Амбасэлмаа:
-"ДЭМБ-ын гишүүн улс бол тус байгууллагын зөвлөмж, зөвлөгөөг дагаж, эрүүл мэндийн тусламж үйлчилгээг үзүүлдэг. Тийм учраас ДЭМБ-ын эмчилгээний удирдамж өөрчлөгдөх тухай бүрд түүнийг дагаж ирсэн. Ингээд 10 сарын хугацаанд 300 гаруй хүнээ эмчлээд байна. Дээрээс нь ОХУ, АНУ-д шинээр нэмэгдсэн эм, шинэчлэгдсэн удирдамжийг давхар дагаж мөрддөг.
Эмчилгээний явцад нэгдүгээрт вирусийн эсрэг, хоёрдугаарт дархлаа дэмжих, гуравдугаарт хүндрэлийн эсрэг, хэрвээ хүндэрсэн бол антибиотик эмчилгээнд орно. Энэ горимыг мөрдсөөр ирсэн. Цаашдаа ч ДЭМБ-ын заавар зөвлөмжийг дагаад явна.
Эмчилгээнд хэрэглэж байгаа эмийг зарлах нь эрсдэлтэй. Өнөөдөр хавьтал болсон байна ирээд шинжилгээ өг гэхэд ирэхгүй байгаа хүмүүс далдуур дур мэдэн эм уугаад биеийн байдал нь хүндрэх эрсдэл байгаа. Тиймээс эмчилгээний нарийн зөвлөгөө зөвлөмжийг яг эмчлүүлж байгаа хүндээ өгнө" гэв.