Засгийн газрын ээлжит хуралдаан яг одоо болж байна.

Энэ удаагийн хуралдаанд Ерөнхийлөгч Х.Баттулга оролцож байна.

Тэрээр өчигдөр /2020.11.17/ цар тахлын үед иргэн, өрх, аж ахуйн нэгжийг эрсдэлээс хамгаалах үүднээс өрх бүрт нэг сая төгрөг олгох албан бичиг хүргүүлсэн юм.

Мөн албан бичигт ард иргэдийн амьдрал хэвийн үргэлжлэх, удаан тэсэх боломжгүйг сануулж, Ерөнхий сайдын зүгээс үүнд анхаарч, нэн тодорхой, шийдэмгий арга хэмжээг даруй авч хэрэгжүүлэхийг төрийн тэргүүний хувиар үүрэг болгосон.

Тодруулбал, “...Эн тэргүүнд, айл өрх бүрийг тухайлан дэмжсэн, бодит дэмжлэг, туслалцаа болох тусгай бодлогыг гаргаж хэрэгжүүлэх шаардлагатай бөгөөд үүний хүрээнд төрөөс өрх бүрд нэг сая төгрөгийн дэмжлэг үзүүлэх хөтөлбөрийг боловсруулж, 2020 оны арванхоёрдугаар сарын 01-ний өдрөөс 2021 оны нэгдүгээр сарын 01-ний өдрийн дотор хэрэгжүүлэх, ингэхдээ 200,000 төгрөгийг бэлнээр олгож, үлдсэн 800,000 төгрөгийг зөвхөн үндэсний үйлдвэрлэгчээс архи, согтууруулах ундаа, тамхины төрлөөс бусад бараа, бүтээгдэхүүн худалдан авах эрхийн бичиг (ваучер) олгох хэрэгтэй” гэсэн юм.

Ерөнхийлөгч энэ асуудлаараа Ерөнхий сайд, Засгийн газрын гишүүдэд байр сууриа илэрхийлж шийдэлд хүрэхээр хуралдаанд оролцож байгаа бололтой.