Засгийн газрын ээлжит бусаар хуралдаж "Бүх нийтийн бэлэн байдлын зэрэгт шилжүүлсэн хугацааг 14 хоногоор буюу 2020 оны 12 дугаар сарын 01-ний өдрийн 06:00 цаг хүртэл сунгасан" шийдвэр гаргасан талаар мэдээлэв. 

Энэ үеэр албаныхан мэдээлэл өгөв.

Хууль зүй, дотоод хэргийн сайд Х.Нямбаатар: "Гэр бүлийн хүчирхийллийн дуудлага 49, өчигдөр 36 болсон. Ердийн үеийнхээс 60 хувь буураад байна. Согтууруулах ундаа түүгээр үйлчлэхийг зогсоосонтой холбоотой гэж бид үзэж байна. Үүнээс гадна цахим орчинд согтууруулах ундаа борлуулах 56 тохиолдлыг таслан зогсоосон. Өчигдөр ЗГ-ын хуралдаанаар нийтийн хэв журам хамгаалах чиглэлээр алба хаагчдад тус бүр 800 мянган төгрөгийн буцалтгүй тусламж үзүүлэхээр болсон. Мөн сонсогчдод хөдөлмөрийн хөлсний доод хэмжээ 420 мянган төгрөгийн тусламж үзүүлэхээр шийдвэрлэсэн" гэлээ.

ЦЕГ-ын дэд дарга, хурандаа Ж.Амгалан: "Иргэдийн хөдөлгөөнийг дроноор хянаж ажиллаж байна. Гэлээ ч зарим нэг хүндрэл гарч байна. Ялангуяа дугаарлах асуудал гарч байна. Одоогоор иргэдийн хөдөлгөөнийг аль болох хязгаарлах нь хүндрэлтэй байна. Олон хавьтагчийг олон газраас олж илрүүлж шинжилгээ хийх нь хүндрэлтэй байгаа" гэв.

Эрүүл мэндийн сайд Т.Мөнхсайхан "Энхсаран сувилалд 40 гаруй хүн халдвар авсан нь тогтоогдсон. Сайн дураар шинжилгээ өгөх хүмүүс өрхийн эмнэлэгтээ цаг аваад шинжилгээ өгнө. Ерөнхийдөө голомтолж гарч байгаа тохиолдол гурван янзынх байна" гэлээ.

Шадар сайд Я.Содбаатар: "Дотоодын халдвартай холбоотой тусгаарлах байрны асуудлыг шийдэж байна. Тусгаарлалтад байгаа хүмүүсийн бүх зардлыг улс гаргахаар болсон. Байрлах газар, хоол хүнсний мөнгийг улсаас гаргаж байна. Сэлэнгийн халдварыг бид судалж байна. Ачаа тээврийн жолооч нараас гаралтай гэж бид таамаглаж байна. Тусгай үүргийн нислэг 11-ний Токиогийн нислэгээр хаагдсан. Тусгаарлах байрнуудыг бид нэг бүрчлэн үзэж, нэг өрөөнд нэг хүн, нэг гэр бүл гэсэн зарчмыг баримтлах болно. Дараа нь бид нислэгийн талаар мэдээлэл өгнө" гэлээ.