11 цагаас хойш манай улсад коронавируст халдварын найман тохиолдол нэмэгдлээ. Ингэснээр өнөөдөр 11 тохиолдол нэмж бүртгэгдэж, Монгол улсад батлагдсан тохиолдол 424 болоод байна.
Одоогоор жолооч Д-гийн ойрын хавьтал болох ахын эхнэр болон хүүгээс халдвар илэрч, онош батлагдлаа.
Халдвар авсан сурагч хүү Нийслэлийн ерөнхий боловсролын ... дугаар сургуулийн 10-р ангид сурдаг ба тухайн үед хичээлдээ явж байсан гэх мэдээлэл байна. Тиймээс сурагчдын дунд халдвар тархсан байж болзошгүй эрсдэл үүсжээ.
Мөн халдвар авсан жолооч Д явсан маршрутаа ташаа мэдүүлсэн талаар өмнө нь мэдээлж байсан. Тэгвэл халдвартай нь тогтоогдсон түүний ойрын хавьтлын хүн караоке, зочид буудал, цайны газар зэргээр үйлчлүүлснээр мөн мэдүүлээгүй байна
Энэ байдал удаа дараа давтагдаж байгаа нь халдварын тархалтыг хумихад хүндрэл учруулж байна.
Энэ талаар мөн Эрүүл мэндийн сайд асан Д.Сарангэрэл "Жолооч Д-гийн ахынх нь эхнэр, хүүхэд хоёроос халдвар илэрчээ. Тиймэс вирус илэрсэн хүмүүстэй ямар нэгэн байдлаар холбогдсон хүмүүс хаагуур явсан, хэнтэй уулзсанаа нуулгүй хэлж, бүхнийг маш сайн эргэн санах хэрэгтэй. Хөл хорио дуусах гэж байхад дахин ойрын хавьтлаас халдвар илэрч буй нь том эрсдэл" гэж олон нийтийн сүлжээнд мэдэгдээд байна.
Харин ХӨСҮТ-ийн Тандалт, судалгааны албаны дарга А.Амбасэлмаа: "Өнөөдөр Улаанбаатарт бүртгэгдсэн голомтот халдварын ойрын хавьтал болох 97 хүнийг давтан шинжилгээнд хамруулахад гурван тохиолдол бүртгэгдлээ.
Нэг нь эхний батлагдсан тохиолдлын охин бол нөгөө хоёр нь батлагдсан тохиолдлын ахын эхнэр, хүүхэд хоёр буюу ойрын хавьтлууд нь байна. Ойрын хавьтлууд учраас тэднийг тусгаарлачихсан байсан.
Мөн энэ хугацаанд ХӨСҮТ-д тусгаарлагдаж байсан 7 хүнээс халдвар илэрч, улсын хэмжээнд нийт батлагдсан тохиолдол 426 боллоо.
Сэлэнгэ аймагт батлагдсан гурван тохиолдол байгаа. Дархан-Уул аймагт хяналтын 173 шинжилгээ хийхэд бүгд сөрөг гарлаа. Сэлэнгэ аймагт 150 шинжилгээ хийснээс 136 хүний хариу сөрөг гарсан" гэлээ.
Эрүүл мэндийн яамнаас үүнтэй холбогдуулан, ТОПАЗ зочид буудал, Сүхбаатар дүүргийн 8-р хорооны "Говь сайхан караоке" 11 дүгээр сарын 09-ний 17-20 цагт, мөн тус хорооны "Өгөөж" 12-14 цагт цайны газарт үйлчлүүлсэн иргэдийг ЭМЯ-ны 119, ХӨСҮТ-ийн 80056829 дугаарт холбогдож зөвлөгөө зөвлөмж авахыг сануулж, анхаарууллаа.
