Эрүүл мэндийн яамнаас коронавирусийн нөхцөл байдал болон тусгаарлагдаад буй жолоочийн нэгдүгээр хавьтал болох 24 хүний шинжилгээний хариуны талаар мэдээлэл хийлээ. 

ХӨСҮТ-ийн ерөнхий захирал Д.Нямхүү "Жолоочийн хадам ээж болон оюутан дүүгийнх нь шинжилгээний хариу эерэг гарсан. Энэ хоёр хүн цааш халдвар тараасан эсэхэд судалгаа хийж байна. Судалгаа хийнэ гэдэг ярвигтай цаг хугацаа орсон ажил. Шинэ илэрсэн хүмүүс дээр зовуурь байхгүй. Ер нь халдварын тохиолдлуудын 80 хувьд хөнгөн хэлбэрээр өвчилж байна.

Өнөөдрийн байдлаар нэг хүний биеийн байдал хүнд буюу уушгинд нь нэвчидэс үүссэн байгаад тохирох эмчилгээг хийж байгаа.

Хэвлэлийнхэнд хандаж хэлэхэд мэдээллийг нэгдсэн журмаар өгөх нь хамгийн зөв юм. Тэр нь ч  бидний ажилд тустай байна. Ээлжлээд маш олон хүн ажил хийлгэхгүй утсаар залгаад асууж байна. Ингэж хариулах нь бидний үндсэн ажил биш. Хамгийн хурдан эцсийн байдлаар гарсан мэдээллээ ингэж зарлаж байна. 

Бид та бүхнээс болоод дотроос хэн мэдээлэл гаргасан гэж бие биенээ хүртэл хардаж байна. Цаашлаад байгууллага дотор ажиллаж байгаа хүмүүс хагаралдах, биедээ гомдох зүйл гарч ирж байна. Ингэж болохгүй биз дээ. Олон талын ажил хийж судалж, нягталж байж та бүхэнд мэдээлдэг. Та бүхэнд хамгийн үнэн бодитой мэдээллийг өгөх гэж л ажиллаж байгаа шүү дээ.

Батдагдаагүй мэдээллээр иргэдийг оволзуулах хэрэггүй шүү дээ. Бид их ядарч байна. Бидний ажлыг хийлгэ" гэв.