Сэлэнгэ аймгийн "Алтанбулаг" боомтоор өнгөрсөн сарын 16-ны Монгол Улсад орж ирэн, арваннэгдүгээр сарын 6-ны өдөр тусгаарлалтаас гарсан олон улсын ачаа тээврийн жолооч болон түүний эхнэрээс коронавирусийн халдвар илэрч, онош батлагдаад байгаа билээ.
Мөн тэдний нэгдүгээр хавьтал гэх 24 хүнийг тусгаарлаж илрүүлэг шинжилгээ авлаа.
Одоо ч албаныхан тухайн иргэний маршрутын дагуу хавьтагч нарыг тогтоон, шинжилгээнд хамруулсаар байна.
Халдвар авсан жолооч нийслэлийн Баянзүрх дүүргийн Дарь-Эхэд хоёр хүүхдийн хамт ам бүл дөрвүүлээ амьдардаг бөгөөд тус айлын хашаанд хадмууд болон хамаатнууд нь мөн хамт амьдардаг байжээ.
Эдгээр гэр бүлийнхнийг коронавирусийн шинжилгээнд хамруулж, шинжилгээний хариу түрүүчээсээ гарч эхэллээ.
Тодруулбал, халдвартай жолооч Д-гийн хадам ээж болон тэдэнтэй хамт тоглолт үзсэн дүүгээс нь коронавирус илэрсэн байна.
Коронавирусийн халдвар авсан дүү нь МУБИС-ийн оюутан гэх ба тэрээр өнгөрсөн хугацаанд хичээлдээ явж байсан нь олон тооны хүнд халдвар тархаасан байж болзошгүй нөхцөл байдал үүсгэсэн гэх мэдээлэл байна.
