Нийгмийн сүлжээнд иргэдийн дунд мэдээллийг буруу ойлгох, цаашлаад буруу ойлголтоо түгээх нь элбэг тохиолддог. Баримт, нотолгоо, судалгаагүй худал мэдээлэл тараах нь маш сөрөг нөлөө дагуулах аюултай. Ялангуяа дэлхий нийтэд цар тахлын аюулын харангатай байх энэ үед юм. Гэвч иргэд бид хардах, асуулт тавих, өөрийн бодол болон эргэн тойронд болж буй үйл явдлаа дүгнэх эрхтэй гэдгийг мөн энд дурьдах нь зүйтэй байх.  

Өнөөдрийн Эрүүл мэндийн яамны хэвлэлийн цахим мэдээллийн үеэр ЦЕГ-ын дэд дарга, хурандаа Ж.Амгалан нийгмийн сүлжээнд тархаад буй асуудлын талаар ярив. 

Тэрээр "Иргэдийн дунд "Коронавирусийн халдварыг дотооддоо алдчихсан юм биш үү" гэсэн хардлага маш өндөр байна. Одоогийн байдлаар дотоодод халдвар алдаагүй гэдгийг албан ёсоор хэлье.

Цагдаагийн байгууллага олон нийтийн аюулгүй байдлыг хангах хуулиар хүлээсэн чиг үүргийн хүрээнд ямар нэгэн зөрчил, эрсдэлийг ард түмнээсээ нууж болохгүй. Бид ил тод шалгаж шийдвэрлэн гарсан зөрчлийг мэргэжлийн байгууллагуудаар нь танилцуулах хуулиар хүлээсэн үүрэгтэй. Энэ үүргээсээ гажихгүй. Тиймээс иргэд олон нийтийн сүлжээгээр тархсан худал мэдээлэл автах хэрэггүй. Эрүүл мэндийн яам, УОК-оос мэдээлж байгаа мэдээлэл л эцсийн үнэн юм.

Ер нь тодорхой судалгаагүй, тооцоогүйгээр өөрийн бодлоо шууд лайваар цацдаг асуудлаа анхаарах хэрэгтэй. Ингэж иргэдээ бухимдуулж, худал мэдээллийг цацах нь маш сөрөг нөлөөтэй.

Хэрвээ бид коронавирусийн халдварыг дотоодод алдахад хүрвэл маш их хүндрэл дагуулна. Иймд иргэд амны хаалтаа заавал зүүж, өөрсдийн ухамсраараа дэг журамтай байх шаардлагатай. Сүүлийн үед нутаг дэвсгэртээ коронавирусийг алдаагүй учраас чөлөөтэй байж болно гэж иргэд ойлгоод байгаа нь гэндсэн асуудал болж хувирах аюултай. Хамгийн анхаарал болгоомжтой байх цаг үе одоо ирсэн байна. Халдвар хамгааллын дэглэмийг сахиж, гараа угааж, олон нийтийн газраар явахгүй байж, амны хаалтаа заавал зүүхийг иргэдээсээ хүсэж байна" гэв.