Өнгөрсөн амралтын өдрүүдэд Тээврийн цагдаагийн албаны жижүүрийн шуурхай удирдлагын хэлтэс нийт 545 дуудлага мэдээлэл хүлээн авснаас зам тээврийн ослын шинжтэй 424 дуудлага мэдээллийг хүлээн авч, шийдвэрлэжээ.
Үүнээс зам, тээврийн ослын улмаас 13 хүн гэмтэж, хоёр хүн амиа алджээ.
Тодруулбал, гэмтсэн 13 хүний гурав нь хүүхэд байгаа бол нийслэлд нэг, орон нутагт нэг хүний амь нас хохирчээ.
Ноцтой ослыг дурьдвал:
-
11 дүгээр сарын 7-ны 06:28 цагийн орчимд Шувуун фабрикийн зам, гал түймэр унтраах 65-р ангийн зүүн хойд замд Toyota prius маркийн автомашины жолооч нь замын хажуугийн хашлага мөргөж, зорчигч, 19 настай, эмэгтэйн амь нас хохирсон.
-
11 дүгээр сарын 7-ны 10:12 цагийн орчимд Хэнтий аймаг Батноров сумын нутагт шороон замд улсын дугааргүй Dayun маркийн мотоцикл онхолдож, жолооч, 34 настай, эрэгтэйн амь нас хохирсон ослууд гарсан байна.
Иймд жолооч нар өөрийн болон бусдын амь нас, эрүүл, мэнд, эд хөрөнгийг болзошгүй эрсдэлээс хамгаалж зуны дугуйгаа өвлийн дугуйгаар солих, орон нутгийн замд хурдыг тогтоосон хязгаараас хэтрүүлэхгүй байх, техникийн бүрэн бүтэн байдлаа хангаж хөдөлгөөнд оролцохыг анхааруулж байна.
Өнгөрсөн хоёр өдөрт нийслэлд 90, орон нутагт 81 жолооч согтууруулах ундааны зүйл хэрэглэсэн үедээ тээврийн хэрэгсэл жолоодсон зөрчлийг илрүүлжээ.
Явган зорчигчид гарцан дээр зам тавьж өгөөгүй 142 жолоочийг Зөрчлийн хуульд заасны дагуу хариуцлага тооцсон байна.
