Улсын онцгой комисс өчигдөр хуралдаж, хуралдаанаас гаргасан шийдвэр болон хэлэлцсэн асуудлын талаар танилцуулав. 

Энэ үеэр Шадар сайд Я.Содбаатар "Халдвар хамгааллын дэглэм сахих асуудал тун чухлаар тавигдаж байгаа бөгөөд дэлхий нийтэд СOVID-19 халдварын хоёр дахь давлагаа эрчимтэй явагдаж, өвчлөл нас баралт нэмэгдэж байгаа тул бид дотооддоо эрсдэлээ бууруулах арга хэмжээг авах зайлшгүй шаардлагатай байна.

Мөн Алтанбулагийн боомт дээр УОК-ын гишүүд очиж ажилласан. Тус боомт нь хамгийн эрсдэлтэй нөхцөл байдал үүссэн. Тиймээс ирэх долоо хоногийн Засгийн газрын хуралдаан тодорхой шийдвэр гаргахаар бэлтгэж байгааг хэлье.

Түүнчлэн өнөөдрийн байдлаар манай улсын ургац хураалтын ажил 95 хувьтай байгаа бол мах бэлтгэх ажил эд эхэлж байна. Өнөөдрийн байдлаар Монгол улсын хэмжээнд хүнсний хангамж төлөвлөсөн хэмжээнд байна. Ямар нэг хомстол бий болох нөхцөл үүсээгүй. Гэхдээ цаашид эрсдэлт нөхцөл байдал буюу дотроо халдвар тархсан нөхцөлд хүнсний хангамж нөөцийн байдал ямар байгааг хэлэлцэж, тодорхой шийдвэр гаргах хэрэгтэй. 

Олон нийтийн сүлжээгээр ташаа утгатай мэдээлэл, хэлэлцүүлэг өрнөж байна. УОК-оос ямар нэг хөл хорио, хязгаарлалт хийх шийдвэр гаргаагүйг онцлон хэлэе.

Монгол Улсад коронавирусийн халдвар дотоодод тархаагүй тул өнөөдрийн байдлаар УОК-оос ямар нэг хориглолт, хязгаарлалт хийсэн шийдвэр гаргаагүй. COVID-19 халдвартай хүнийг эмчилж байсан сувилагчаас халдвар илэрсэнтэй холбоотой буруу ойлголт явж байна. Тухайн сувилагч бол дотроо буюу халдвар хамгааллын дэглэмдээ ажиллаж байсан бөгөөд ямар нэг байдлаар гадаад орчинд, энгийн иргэдтэй харилцсан зүйл байхгүй.

Сүүлийн өдрүүдэд ачаа тээврийн жолооч нараас өдөр бүр тохиолдол илэрч, эрсдэлт нөхцөл өндөрсөж байгаа. Иймд Алтанбулгын боотмоор ирж байгаа ачаа тээврийн жолооч нарын тодорхой бүсд байршуулж, наашаа хил нэвтрүүлэхгүй байх шийдвэр гаргасан. Манай талаас жолооч нарыг 72 цагийн дотор PCR шинжилгээнд хамрагдах шаардлага тавьж байгаа боловч хилийн цаана байгаа нөхцөл байдлыг харахад төдийлөн нөхцөл боломж муу байна. Ийм учраас Монгол улсын Гадаад харилцааны сайдыг хоёр хөрш оронтойгоо боомтын асуудлаар тодорхой нэгдсэн шийдвэр гаргахаар ажиллах, шийдвэр гаргахаар шийдвэрлэсэн байгаа" гэлээ. 

Мөн тэрээр үргэлжлүүлэн "Цахим орчинд БНХАУ-аас орж ирж байгаа ажиллах хүчинтэй холбоотой худал мэдээлэл явж байна. Монгол Улс ажиллах хүчин оруулж ирдэг тусгай хуультай, түүнийг хянадаг байгууллагатай. Өнөөдөр Монгол Улсад гаднаас ажиллах хүч оруулж ирэх асуудал төрийн бүрэн хяналтад байгаа. Ямар нэгэн хяналтгүйгээр, хэн нэгнийг тэр тусмаа шөнийн цагаар оруулаагүй.

Мөн энэ жил маш бага хэмжээгээр буюу зөвхөн удирдах албан тушаалтан, инженер техникийн ажилтнуудыг гаднаас оруулж ирж байгаа. Ийм шаардлага нь ч Монгол Улсын нийгэм, эдийн засагт байна. Долдугаар сар хүртэл ажиллах хүчийг оруулж ирэхийг хориглосонтой холбоотой бүтээн байгуулалтын маш олон ажил зогссон. Олон ААН-ийн хөрөнгө оруулалт, бүтээн байгуулалтын ажлууд зогссон. Олон улсын зээл тусламжаар хийгдэж байгаа ажлууд тендер зарлагддаг. Түүнд БНХАУ болон гадны компаниуд шалгардаг. Тэр ААН-үүд удирлах албан тушаалтнуудаа оруулж ирж байж ажил нь эхэлдэг. Цалинг тавидаг. 

Налайх, Дарханы замаас эхлээд цэвэрлэх байгууламж, хэд хэдэн эмнэлэгийн барилгыг бүрэн дуусгах хэрэгтэй байна. Энэ бүхэн дээр гадны ажиллах хүчин оруулж ирэх шаардлага гарч байна. 

Хан-Уул дүүргийн 300 ортой эмнэлэг, Халдвартын эмнэлгийн өргөтгөлийг хийхэд гадны ажиллах хүчин оруулж ирж, технологийн нарын ажлыг хийлгэх хэрэгтэй байна. Монголчууд зарим ажлыг үнэхээр хийж чадахгүй байна. Үнэнээ хэлэе. 

Гадны ажиллах хүчийг маш хатуу хяналт доор, цөөн тоогоор, хоёр улсын гэрээ хэлэлцээрийн хүрээнд, хууль хүчний байгууллагын хяналт доор ажиллуулж байгаа.

Засгийн газар өчигдөр он дуустал БНХАУ-аас орж ирэх ажиллах хүчний хөдөлгөөнийг зогсоосон. Гэтэл өчигдөр шөнө оруулж ирж байгаа мэтээр, өмнө нь орж ирсэн хүмүүсийг халдвар хамгааллын дэглэм сахиулаагүй мэтээр улс төржсөн агуулгаар мэдээлэл хийж байна.

Иргэдийг төөрөгдүүлж, улстөрийн зорилгоор хандаж буй уг асуудалд хуулийн байгууллагаас арга хэмжээ авна. Энэ асуудалтай холбоотой худал мэдээллийг зохион байгуулалттайгаар цөөн тооны хүмүүс олон нийтийн сүлжээнд дэвэргэж байна.

Хариуцлагатайгаар хэлэе. Энд хууль зөрчигдсөн, хараа хяналтаас гарсан зүйл байхгүй" гэлээ.