Засгийн газрын өчигдөрийн хуралдаанаар "Шинэ жилийн арга хэмжээг хийхгүй байх шийдвэр гаргаж байна. Гэр бүлийн түвшинд тэмдэглэх нь нээлттэй. Үйлчилгээний салбарт энэ асуудал хүндээр тусаж байгаа ч 3.2 сая иргэдийн эрх ашгийг хүндэтгэх нь зөв" хэмээн Шадар сайд Я.Содбаатар хэлсэн юм. 

Энэ шийдвэр үйлчилгээний бизнес эрхлэгчид болон урлагийнхны дургүйг нэлээд хүргэлээ. Иргэдийн зүгээс засгийн газрын гаргасан шийдвэрийг дэмжиж байгаагаа сошил орчинд илэрхийлсээр байгаа. 

Тэгвэл Фантастик продакшны жүжигчин Ж.Алтаншагай өөрийн цахим хуудаснаа “…Засгийн газрын шийдвэр түй ... шүү. Дотороо алдаагүй гэчихээд шинэ жил хийлгэхгүй ч гэх шиг хуцаарай” хэмээн эсэргүүцлээ илэрхийлжээ.

Харин "Комиде Лаб" клубын комидиан Д.Амартүвшин өөрийн цахим хуудаснаа лайв хийж үзэл бодлоо илэрхийллээ. 

Тэрээр "Шинэ жил тэмдэглүүлэхгүй байх нь маш зөв шийвдэр шүү. Харин бусад баярыг тэмдэглэж болох юм байна. Хурим, үсний найр, төрсөн өдөр, одонгийн найр гээд... Энэ шийдвэр монгол улс, төрийнхний хувьд зөв шийдвэр. Учир нь энэ баяраар маш их бизнес явагддаг, арилжаа наймаа хийгддэг. Энэ үеэр татвар авахгүй, төрд татвар бага орно. Тэгэхээр авлига багасна. Мөн энэ үеээр ажилладаг олон хүн ядуусын энгээнд шилжинэ. Ер нь бөөндөө доошоо унана. Бид цар тахал гээд өнгөрсөн хаваржингаа бизнес эрхэлсэнгүй. Намраас нэг юм үйл ажиллагаагаа явуулж сэргэж байсан эдийн засаг унах нь. Ер нь бол эдийн засаг гэдэг маш том хоорондоо уялдаа холбоотой дам процесс байдаг. Одоо улам олон хүн хөл дээрээ сөхрөх хэрэгтэй, эдийн засгаа агшаах хэрэгтэй. Зөвхөн энэ шийдвэр маш олон хоол хийдэг, хувцас зардаг, талбай түрээслэдэг, түүхий эд бэлтгэдэг хүмүүсд нөлөөлнө. Манай монголчууд хэлээд ойлгодоггүй. Бие дээрээ мэдрэгдэхэд л ойлгодог тийм учраас цаашид бүх баяраа хориосой. Эдийн засгаа элгээрээ хэвтүүлж байж ойлгох юм байна. Энэ бол зөвхөн хэдэн дуучин, хөтлөгчийн асуудал биш. Хүн алгадуулж байж ухаардаг гэдэг. Монгол бүх хүн алгадуулах хэрэгтэй. Эдийн засгийн онол яриад олгохгүй юм байна" гэлээ.