“Стратеги Академи” ТББ-аас хүүхдийн эсрэг хүчирхийллээс урьдчилан сэргийлэх, таслан зогсоох зорилгоор орон даяар “Хамтдаа хамгаалъя” аяныг өрнүүлж байгаа билээ.
Уг аяны хүрээнд ЕБС-уудын бага анги “Аз жаргалтай хүүхэд”, дунд анги “Хүүхдэд ээлтэй Монгол”, ахлах анги “Хамтдаа хамгаалъя” гэсэн сэдвийн хүрээнд гар зургийн уралдааныг Монголын хүүхдийн урлан бүтээх төвтэй хамтран зохион байгууллаа.
Тус гар зургийн уралдаанд энэ сарын 21-ний өдрийг хүртэл аймаг хот, нийслэлийн 340 гаруй хүүхэд бүтээлээ ирүүлжээ. Гурван ангилалд хүүхэд бүр өөрсдийн чөлөөт, бүтээлч сэтгэлгээгээр сэдвээ илэрхийлэн зурцгаасан байна.
Хүүхэд гэдэг яг л цагаан цаас шиг, тэд харж сонссон бүхнээ даган дуурайж томчуудын тусгал байдаг. Хүүхдүүдийн хувьд аз жаргал нь найз нөхөдтэйгээ тоглох, гэр бүлтэйгээ халуун дулаан уур амьсгалтай байх гэдгийг бүтээлүүдээс нь харж болно.
Монголын хүүхдийн урлан бүтээх төвд тус уралдааны бага, дунд, ахлах ангийн тус бүр шилдэг гурван бүтээлийг шалгаруулж, уралдааны ялагчдаа энэ сарын 23-нд тодруулсан байна.
Шагналт байранд шалгарсан есөн бүтээлээс гадна шилдэг 53 бүтээлээр арваннэгдүгээр сарын 1-ний ням гаригт 10:00-18:00 цагийн хооронд “Blue Moon Art Gallery”-д үзэсгэлэн дэлгэгдэх аж.
