Дарханы зам дээр хохирсон олон иргэнээс анх удаа шүүхэд хандсан иргэний шүүх хурал өнөөдөр СБД-ийн иргэний хэргийн шүүх дээр болж, уг хурлыг ирэх сарын 11 хүртэл хойшлуулжээ. 

Дархан-Уул аймаг Улаанбаатар чиглэлийн зам засварын ажлыг хугацаанд нь дуусгаагүйгээс болж олон иргэн эрүүл мэнд, амь нас, эд хөрөнгөөрөө хохирсон гэж гомдол гаргажээ.

Засгийн газар болон холбогдох яамнаас 2019 оны арваннэгдүгээр сард ашиглалтад оруулна гэж мэдээлж байсан билээ.

Дөрвөн сая төгрөгийн хохиролтой иргэн “А”-ийн итгэмжлэгдсэн төлөөлөгч, “Хэвтүүл” хөдөлгөөний зохицуулагч А.Цэрэнбат "Шүүх хуралдаан ирэх сарын 11-н хүртэл хойшиллоо. Бид зургаадугаар сард нэг хохирогч дээр иргэний хэргийн шүүх маргаан үүсгэсэн юм. Бидэнд бүртгэлтэй 200 гаруй хохирогч байна. Гэсэн хэдий ч шүүхийн нотлох баримтын шаардлага хангахгүй байна хэмээн ихэнх материалыг буцаагаад байна.

Энэ удаагийн шүүх хурал хойшилсон шалтгаан Зам, тээврийн яам, Азийн хөгжлийн банкны хооронд хийсэн тус замыг засах тухай гэрээ англи хэлээр байгаа учир Монгол Улсын шүүх уг гэрээг уншаад ойлгохгүй байна гэлээ. Дарханы замыг 65 сая ам.доллар буюу 150 тэрбум төгрөгөөр хийж буй юм. Эх хэлний тухай хуулиар төрийн албаны үйл хэрэг монгол хэл дээр байна гэж заасан. Шүүх, шүүхээс гарч буй шийдвэр захирамж нь монгол хэлээр явагдах ёстой. Зургаадугаар сард шүүхээс энэ гэрээг орчуулж ирэх шаардлагыг Зам, тээврийн яаманд захирамж гарган өгсөн.

Харин Зам, тээврийн яам өнөөдөр тус гэрээг орчуулж чадахгүй гэж байна. Монгол Улсын төр шүүхээрээ дамжуулж иргэнийхээ эрхийг хамгаалдаг. Гэтэл Монгол Улсын шүүхийг Зам, тээврийн яам доромжилж байна. Бүтэн хоёр сарын дараа шүүх хурал болоход гэрээгээ орчуулаагүй гээд хоосон ирлээ.

Зам, тээврийн яамны Гадаад харилцаа хамтын ажиллагааны хэлтэс албан бус орчуулга хийдэг учраас орчуулаагүй гэх тайлбарыг өгч байна.

Ганц хүний хэрэг мэт боловч ард нь олон хүн бий. Төрийн байгууллагууд нотлох баримтаа өгөхгүй байна. Зам, тээврийн яам Азийн хөгжлийн банктай байгуулсан гэрээ нь монгол хэлээр биш англи хэл дээр байна.  Тодруулбал уг гэрээг орчуулаагүйн улмаас  шүүх хурал дахин хойшиллоо. Дарханы зам энэ жил ч ашиглалтад орохооргүй байна. Тус чиглэлд зорчиж байгаад бэртэж гэмтсэнээ бичлэг баримтаар баталсан тохиолдолд хохирлыг Зам тээврийн яамаар гаргуулах боломжтойг иргэд мэдэх ёстой. Хохирогч А-гийн тухайд "Дарханы замд зорчих явцад ачаа тээврийн машины дугай нь 4 удаа буудсан. Үүнийгээ бичлэг, зураг болон бусад баримтаар нотолсон учраас иргэний хэрэг үүсгэсэн. "Иргэд нотлох баримтаа сайн бүрдүүлэх хэрэгтэй. Тус чиглэлд зорчиж байгаад амь насаа алдсан гэх үндэслэлээр бидэн хоёр, гурван хүн хандаж байсан. Гэвч талийгаачийнхаа нэрийг хөндөхгүй гэдэг шалтгаанаар хэрэг үүсгэх боломжгүй болж байсан. Замын нөхцөл байдлаас хамааран иргэнд гэм хохирол учирсан бол төр захиргааны байгууллага хариуцна гэж Авто замын тухай хуулийн 10-р зүйлд бий" гэлээ.