Баянзүрх дүүргийн Эрүүгийн хэргийн анхан шатны шүүхэд өнөөдөр /2020.10.23/ 10.00 цагт товлогдоод байсан “Зөв амьдрах ухаан” ТББ-ын тэргүүн Г.Загдаа, түүний эхнэр ГАмарсайхан нарт холбогдох хэргийн шүүх дахин хойшилжээ. Шүүх хуралдаанд улсын яллагчаар оролцох ёстой прокурор Ц.Гантулгабат прокурорын байгууллагын 90 жилийн ойн соёлын арга хэмжээнд оролцож байгаа, мөн шүүгдэгч нарын өмгөөлөгчөөс шүүх хуралдааныг хойшлуулах тухай хүсэлт ирүүлсэн тул шүүх хурлыг ирэх сарын 9-ний өдрийн 10.00 цаг хүртэл хойшлуулсан байна. 

Өмнө нь Г.Загдаа, Г.Амарсайхан нарт холбогдох шүүх хурлыг энэ сарын 8-ны өдөр товлосон ч өмгөөлөгч С.Оюунцэцэг нь эрүүл мэндийн шалтгааны улмаас хуралд оролцох боломжгүй тухай эмчийн магадлагаа ирүүлсэн тул шүүх хурлыг хойшлуулж, өнөөдөр хуралдуулахаар товлосон байна.

Сануулахад, прокурорын байгууллагаас Г.Загдааг бусдыг удаа дараа хүчирхийлсэн, эхнэртэйгээ нийлэн хууль сахиулагчийн ажилд саад учруулсан хэрэгт  буруутгаж, яллах дүгнэлт үйлдэн шүүхэд ирүүлжээ. Энэ хэргийг иргэн Д.Халиунаагийн гомдлоор Баянзүрх дүүргийн цагдаагийн хэлтэст эрүүгийн хэрэг үүсгэн шалгаж, мөрдөн шалгах ажиллагаа явуулсан байна.