Гурав дахь удаагаа болж байгаа “Яг түүн шиг” шоуны тод оролцогчдын нэг дуучин Б.Нацагдорж буюу Наки ярилцлага өгчээ. Наки шоуны сүүлийн дугаарт “Хуан Жу гэг” киноны тавдугаар агийн дууг дуулж хоёр дахь удаагаа дугаарын ялагч болохоо тун дөхсөн. Шүүгчдийн болон оролцогчдийн өгсөн оноогоор тав дахь дугаарыг тэргүүлж явсан Наки жүжигчин Цэдо (Цэрэндолгор)-д өөрийн “эрдэнэ мэт” гурван оноогоо өгөөгүй, өөр хэн нэгэнд өгсөн бол тэр яалт ч үгүй ялагч болох байлаа.

Өмнөх дөрвөн дугаарт дэлхийн супер од Beyonce, Филипп Киркоров, Д.Жаргалсайхан, Justin Timberlake нарыг дууриаж, Beyonce-гийн дуугаар анхны дугаарын ялагч болсон Наки хэрэв боломж олдож, “buzzer-ийн бурхан тэнгэр” ивээвэл Уитни Хьюстон, Мэрай Кери нарыг дууриаж дуулахыг хүсдэг тухайгаа ярьсан байна. Наки дуугаа хатуу дуулдаггүй, аргадаж зөөлөн дуулахыг хүсдэг учраас эмэгтэй хүний уянгалаг, зөөлөн байдал өөрийнх нь хоолойд илүү дөхөж очих боловуу гэжээ. Мөн шоуны хугацаанд түүний хамгийн гол өрсөлдөгчөөр “A-Sound” хамтлагийн дуучин Тэмүүлэнг нэрлэжээ. Ц.Тэмүүлэнгийн авьяасаас гадна хувь хүнийх нь үзэл бодлыг хүндэтгэж явдгаа хэлсэн байна.

Харин шоуны дугаар бүрийг өнгөлдөг “Эмоци” продакшны жүжигчин Тэмүүжин Накигийн өрсөлдөгчийн тоонд багтсангүй.

Б.ЗАЯА