НИТХ дахь АН-ын бүлгийн зүгээс УИХ-ын гишүүн С.Амарсайханд шаардлага хүргүүлж байгаагаа өнөөдөр мэдэгдлээ.
2020 оны 5-р сарын 28-ны өдөр Хотын захирагч асан С.Амарсайхан "Коронавируст цар тахлын үеийн харилцан ажиллагаа, хариу арга хэмжээ" сэдэвт гамшгаас хамгаалах иж бүрэн дадлага сургуулийг зохион байгуулсан Нийслэлийн нутгийн захиргааны байгууллагын нийт 21 албан тушаалтныг шагнаж урамшуулах захирамж гаргасан байдаг.
Энэ захирамжийн гол асуудал нь иргэд олон нийтийн зүгээс ирүүлсэн сэтгэлийн хандиваас урамшуулалыг олгох шийдвэр гаргасан байгаа юм.
М.Тулгат: Нийслэлийн албан тушаалтнуудад мөнгөн урамшуулал олгох шийдвэр 2020 оны Тавдугаар сарын 6-ны өдөр гаргасан байгаа. Иргэдийн зүгээс өөр өөрийн чадлын хэрээр УОК-т мөнгө хандивласан. Холбогдох байгууллагын албан тушаалтнууд цар тахлын үед сайн ажилласан. Үүнийг үгүйсгэх арга байхгүй. Хамгийн гол нь иргэдийн хандивын мөнгөнөөс өөрсдийгөө шагнаж урамшуулсан асуудал нь ёс зүйн хувьд маш ноцтой, алдаатай шийдвэр болсон гэж үзээд Хотын захирагчийн албыг түр орлон гүйцэтгэж байгаа Ж.Батбаясгалан болон Хотын дарга асан С.Амарсайхан нарын нийслэлийн иргэдээс уучлалт гуйхыг шаардаж байна" гэлээ.
