Өнөөдөр засгийн газрын ээлжит бус хуралдаан болж өндөржүүлсэн бэлэн байдлын зэргийн хугацааг Арвандүгээр сарын 1-н хүртэл сунгах шийдвэр гаргалаа.

Харин бүх шатны боловсролын байгууллагуудын үйл ажиллагааг Есдүгээр сарын 21-нээс энгийн горимд шилжүүлэхээр эцэслэн шийдвэрлэлээ.

Ингэснээр Есдүгээр сарын 21-нээс буюу ирэх долоо хоногийн Даваа гаригаас эхлэн ЕБС, их, дээд сургуулийн хичээлийг хэвийн горимоор оруулахаар боллоо.

Их, дээд сургуулийн хичээлийг 2020 оны Аравдугаар сарын 4-нөөс эхлүүлэх шийдвэр гаргаж байсан ч ийнхүү хугацаг нь урагшлууллаа. 

Өнгөрсөн найман сарын хугацаанд дотооддоо коронавирусийн халдварыг алдаагүй байгаа тул 9 дүгээр сарын 16-наас урлаг, спорт болон олон нийтийг хамарсан үйл ажиллагаа, худалдаа үйлчилгээний газруудын цагийн хуваарийг хэвийн горимд буцаан оруулахаар болсон байна.

Ингэснээр ААН, байгууллагууд хуучин хэвээрээ ажиллахаар болж байгаа юм. 

Тодруулбал, хилийн онцгой дэглэмээс бусад бүх хориог бүрэн цуцалж байгаа юм. 

Энэ талаар Засгийн газрын Хэвлэл мэдээлэл, олон нийттэй харилцах хэлтсийн дарга Ц.Ганзориг "Хилийг одоогоор нээхгүй. Энэ нь цар тахлын халдвар орж ирэхээс сэргийлж байгаа арга хэмжээ юм. Харин тусгаарлалтын хугацаа одоогоор 35 хоног /тусгаарлах байранд 21, гэртээ 14/ байгааг 21 болгон багасгаж байна. Ингэснээр 21 хоногийн хугацаанд тусгаарлалтад байсан иргэд дахин гэртээ 14 хоног өөрийгөө тусгаарлах шаардлага байхгүй болж байгаа" гэлээ.