Үндэсний их баяр наадмаар дээгүүр барилдсан өндөр цолтой гурван бөхөөс допинг илэрсэн тухай цахим орчинд тараад эхэлжээ.
Баяр наадмаар тав давсан 32 бөхөөс допингийн шинжилгээ авдаг бөгөөд шинжилгээг БНСУ-ын итгэмжлэгдсэн лабораторид хийлгэдэг юм. Бөхчүүдийн шинжилгээний хариу өнгөрсөн мягмар гаригт буюу гурван өдрийн өмнө иржээ. Гэвч албан ёсны мэдээлэл хийгээгүй байгаа юм.
Тэгвэл энэ талаар Монгол Улсын аварга П.Бүрэнтөгс өөрийн цахим хуудсаар дамжуулан мэдэгдэл хийлээ.
Тэрээр "Баяр наадмын дараа найр наадам гэж нэлээд явж байгаад саяхнаас бэлтгэлдээ орлоо. Допингийн эсрэг үндэсний төвөөс надад ямарваа нэгэн хариу хэлээгүй байгаа. Удахгүй мэдэгдэх байх. Хариу ирсний дараа олон түмэндээ мэдээлнэ. Надад нууж хаах зүйл байхгүй. Худал ташаа мэдээлэлд битгий автаарай" гэлээ.
