УОК-ын Шуурхай штабын ажиллагааны багийн гишүүн, хурандаа Д.Жавхланбаяр тусгаарлан ажиглах байрны талаарх мэдээллийг танилцууллаа. 

Тэрээр “Улаанбаатар хот болон Төв аймгийн нутаг дэвсгэр дэх нийт 35 тусгаарлах байранд олон улсын чартер нислэгээр ирсэн иргэдийг тусгаарлаж байна. Тэдгээр байр нь нийт 1734 өрөөтэй бөгөөд нэг удаа хамгийн дээд тал нь 2700 гаруй иргэнийг хүлээн авах бүрэн хүчин чадалтай.

Нэг нислэгийг хүлээн авахдаа 150-170 өрөөтэй, 260-аас дээш ортой 3-5 тусгаарлан ажиглах байрыг төлөвлөн бэлтгэдэг. Одоогийн хүчин чадлаараа тусгаарлах байрууд нэг удаадаа 11 нислэгийг хүлээн авах боломжтой. Энэ сарын хувьд нийт 14 нислэгийг хүлээн авах боломжтой байна.

Өнөөдрийн байдлаар манай улсад 3246 иргэн тусгаарлагдах байранд байгаа бол гэрийн ажиглалтад 2266 иргэн байна. 

Иргэд гадаадын иргэдийн тусгаарлан ажиглах байрны талаар асуудаг талаар тайлбарлая. Чартер нислэгээр гадаадаас ирсэн иргэдийг Улаанбаатар хотод өндөр үнэтэй тусгаарлан ажиглах байруудад тусгаарлахаас гадна манай иргэд удаа дараа гомдол гаргасан Тулгат, Баянхангай зэрэг тусгаарлах байруудад ялгаагүй тусгаарлаж байгаа.

Тодруулбал, тусгаарлах байрны шаардлага хангахгүй зочид буудал болон амралтын газруудад тусгаарлаж байна.

Мөн газраар ирж байгаа гадаадын ажиллах хүчийг орон нутаг дахь тусгаарлах байрууд болон тухайн ажлын байран дээр нь тусад нь кэмп байгуулж, цагдаа, эрүүл мэнд, онцгой байдлын алба хаагчдын хяналт дор тусгаарлаж байна" гэлээ.