Хүүхдийн эсрэг нуугдмал гэмт хэргийг илрүүлэх, иргэдээс мэдээ мэдээлэл авах, бэлгийн хүчирхийлэл, аливаа гэмт хэргээс урьдчилан сэргийлэх, эцэг эхийн үүрэг хариуцлагыг нэмэгдүүлэх зорилгоор "Сүүдэр бүү тусга" аяныг эхлүүлээд байна. 

Энэ талаар ЦЕГ-ын Хүүхэд гэмт хэргээс урьдчилан сэргийлэх хэлтсийн дарга, цагдаагийн хошууч Д.Будзаан:  "Гэр бүлийн хөгжил төлөвшил, үүрэг хариуцлага, соён гэгээрүүлэх чиглэлээр урьдчилсан сэргийлэх арга хэмжээг сарын хугацаанд зохион байгуулна. Нөгөөтэйгүүр, Цагдаагийн байгууллагаас хүүхэд хохирсон нуугдмал, илрээгүй хэргийг мөрдөн шалгаж, илрүүлэх ажиллагааг эрчимжүүлнэ.

Мөн хөдөө орон нутагт хүүхдийн нуугдмал хүчирхийлэл түлхүү гардаг учир тэгдгээр гэмт хэрэг үйлдэгч нарыг урьдчилан сэргийлэх зорилгоор мэдээллийг хүргэнэ. Сүүлийн 3 жилийн хугацаанд ахуйн бэлгийн хүчирхийлэл үйлдэгч нарын дийлэнх нь ойр дотны хүмүүс нь байна гэсэн судалгаа гарсан.
2017 оны суурь судалгаанаас харахад хүүхдийн бие махбодын хүчирхийллийн 49.7 хувь нь гэр бүлийн орчин, сургуулийн орчинд үйлдэгдсэн байна. Тиймээс хүүхэд рүү чиглэсэн мэдээ мэдээлэл, контентийг зөв зохистой мэдээллийг түгээх уриалгын дор уг арга хэмжээг зохион байгуулж байна.

Жилд дунджаар 6 мянга орчим буюу таван хүн тутмын нэг нь цагдаагийн байгууллагад ханддаг. Гудамж талбай, гэр бүлийн хүрээнд, бэлгийн хүчирхийлэлд өртөж хүүхдийн эрх ноцтой зөрчигдөж байгаа ба сүүлийн 3 жилийн байдлаар 3378 хүүхэд гэмт хэрэг үйлдэж, 5043 хүүхэд гэмт хэргийн хохирогч болсон гэх харамсалтай судалгаа байна.

Түүнчлэн, сүүлийн 3 жилийн хугацаанд хүүхдийн бэлгийн хүчирхийлэл өссөөр байна. Энэ бол эрүүгийн хуулинд заасан хамгийн хүнд ял буюу бүх насаар нь хорих ялтай гэмт хэрэг юм" гэлээ.