Манай улс 14 жил ажиглагчаар оролцсон Шанхайн хамтын ажиллагааны байгууллагын дээд хэмжээний ээлжит уулзалт арав гаруй хоногийн дараа болох гэж буй. Үүнээс өмнө манай улс тус байгууллагын гишүүн болох шийдвэр гаргах эсэх нь олон нийтийн анхаарлын төвд байна.

Ерөнхийлөгч Х.Баттулга ШХАБ-д элсэх нь эдийн засагт эергээр нөлөөлөхийн зэрэгцээ томоохон төсөл хөтөлбөрүүд хөдлөх боломж бүрдэнэ гэдгийг Эдийн засгийн чуулга уулзалтад оролцох үеэрээ хэлсэн. Үүнээс хойш ШХАБ-ын гишүүн болох нь зөв буруу гэсэн хэлэлцүүлэг олон нийтийн дунд өрнөлөө. Тухайлбал, Гадаад харилцааны сайдаар ажиллаж байсан хүмүүс болоод дипломатчид ШХАБ-д элсэх нь гуравдагч хөршийн харилцаагүй болж, эдийн засгаа хумих эрсдэлтэй учир төвийг сахих бодлогоо баримтлан ажиглагчийн статусаа үргэлжлүүлэх нь зүйтэй гэх байр суурь, илэрхийлсэн.

Харин анх улс төрийн нэгдэл болон байгуулагдсан ШХАБ өөрийн стратеги бичиг баримтаа боловсруулснаар 2015 оноос хойш тус байгууллагын нөхцөл байдал олон улсын төвшинд өөр болж байгааг Гадаад харилцааны сайд онцолсон юм. Тэгвэл манай улс ажиглагчийн байр сууриа хадгалах уу, эсвэл гишүүнээр элсэх үү гэдгээ өнөөдөр шийдэх бололтой. Тодруулбал, УИХ-ын чуулганы хуралдаанаар гадаад бодлогын асуудлаар Ерөнхий сайдын мэдээллийг сонсож, ШХАБ-д элсэх эсэхийг хаалттай горимоор хэлэлцэх гэнэ. Энэхүү хуралдаанд Ерөнхийлөгч Х.Баттулга ч оролцох юм байна. Үүний өмнө буюу өчигдөр УИХ-дахь МАН-ын бүлгийнхэн хуралдаж, уг асуудлаар байр сууриа нэгтгэжээ.

ШХАБ-ыг анх 1996 онд Орос, Хятад, Казахстан, Киргиз, Тажикстан Улсын төрийн тэргүүнүүд уулзаж, хилийн цэргийн салбарын итгэлцлийг бэхжүүлэх тухай гэрээнд гарын үсэг зурснаар улс төрийн нэгдэл болгон байгуулсан түүхтэй. Үүнээс хойш ШХАБ Узбекстан, Энэтхэг, Пакистан Улсыг гишүүнээр элсүүлж, ажиглагч болоод түншийн хүрээгээ тэлсэн байна.

Түүнчлэн ирэх сарын 9-10-нд БНХАУ-ын Чиндао хотноо болох ШХАБ-ын дээд хэмжээний уулзалтын үеэр ОХУ, Монгол, БНХАУ-ын төрийн тэргүүн нар гурван талт уулзалт хийхээр төлөвлөсөн байна. Уг уулзалтаар эдийн засгийн коридорын асуудлыг хөндөх бөгөөд төмөр зам, цахилгаан дамжуулах сүлжээ, авто замын төслүүдийг эхлүүлэхээр төлөвлөжээ.

Эх сурвалж: ҮНДЭСНИЙ ШУУДАН