Өнөөдөр Улсын Онцгой комиссын Шуурхай штабаас цаг үеийн асуудлаар мэдээлэл хийлээ. 

Есдүгээр сард 12 удаагийн нислэг үйлдэж 3120 орчим иргэнээ татан авахаар төлөвлөжээ.Энэ талаар Гадаад харилцааны яамны Консулын газрын захирал Л.Мөнхтүшиг "Одоогийн байдлаар 62 удаа тусгай үүргийн нислэг үйлдэж, 12976 иргэнээ авчирсан байна.  

Өнөөдрийн байдлаар 48 улсаас 12409 иргэн нутаг буцах хүсэлтээ өгөөд байна.

Хил хаагдсанаас хойш хугацаанд буюу 2020 оны гуравдугаар сарын 15-наас наймдугаар сарын 26-ны өдрийг хүртэл 12793 иргэн эх орондоо ирсэн. Энэ хугацаанд 4168 иргэн гадаадын улс оронд зорчоод байгаа. Эдгээр иргэнээс мөн эх нутагтаа ирэх хүсэлтээ өгч байна.

Мөн хүмүүнлэнгийн шалтгаанаар буюу хүнд өвчтэй иргэдээ гадаадад зорчиход нь Гадаад харилцааны яам тусалж, тухайн улсын ЭСЯ-тай хамтран ажиллаж байгаа. Энэ хугацаанд хэд хэдэн иргэнийг БНХАУ-д зорчуулж, хүнд хагалгаанд оруулан, амжилттай болсон тохиолдол бий" гэлээ. 

Мөн тэрээр үргэлжлүүлэн "Гадаад иргэд Монголд ирж чадахгүй байснаар гадаад багштай сургуулиуд хичээлээ заах боломжгүй байна. Мөн зарим ЭСЯ-ны ажилтнуудын ихэнхи нь гадаадын улсаас ирж чадахгүй байгаагаас үйл ажиллагаа явуулахад хүндрэлтэй болох, удирдлагууд нь ирж чадахгүйгээс шалтгаалж цалингаа олгох боломжгүй байгаа компаниуд ч байна. Тиймээс УОК-ын даргын өгсөн зөвшөөрлийн дагуу маргааш Сөүл рүү тусгай үүргийн нислэг үйлдэж, зөвхөн гадаад иргэдийг авчрахаар болсон. Одоогийн байдлаар 15 улсын 100 гаруй иргэн ирэхээр МИАТ ТӨХК-аас тасалбараа авсан байгаа" гэсэн юм. 

2020 оны есдүгээр сард төлөвлөгдөж буй нислэгүүд:

• Есдүгээр сарын 2-нд Сөүл- Улаанбаатар, 

• Есдүгээр сарын 8-нд Хонг Конг /транзит/- Улаанбаатар, 

• Есдүгээр сарын 9-нд Токио- Улаанбаатар, 

• Есдүгээр сарын 14-нд Франкфурт- Улаанбаатар, 

• Есдүгээр сарын 15-нд Сөүл- Улаанбаатар, 

• Есдүгээр сарын 17-нд Хонг Конг /транзит/- Улаанбаатар, 

• Есдүгээр сарын 18-нд Истанбул- Улаанбаатар, 

• Есдүгээр сарын 21-нд Токио- Улаанбаатар, 

• Есдүгээр сарын 23-нд Франкфурт- Улаанбаатар, 

• Есдүгээр сарын 24-нд Сөүл- Улаанбаатар, 

• Есдүгээр сарын 25-нд Сидней- Улаанбаатар, 

• Есдүгээр сарын 28-нд Сиэтл- Улаанбаатар 

Нэг чиглэлийн тусгай нислэгт нийт 260 орчим хүн байхаар төлөвлөсөн байна.