Улсын хэмжээнд сураггүй алга болсон гурван хүнийг хайх ажиллагааг зохион байгуулж байна.

Тодруулбал, Нийслэлийн Налайх дүүргийн 6 дугаар хороонд орших “Тэнгэрийн энерги бясалгалын төв” орчмоос Хан-Уул дүүргийн харьяат, иргэн О долдугаар сарын 31-ний өдөр сураггүй алга болсон юм. Түүнийг 25 хоног эрэн хайж байгаа боловч олдоогүй байна. Улмаар өнөөдөр 10:00 цагт эрэн хайх ажиллагааг дахин эхлүүлжээ. 

Мөн Баян-Өлгий аймгийн Улаанхус сумын төвөөс зүүн хойд зүгт 50 км-т орших “Алаг толгой” гэдэг газраас наймдугаар сарын 18-ны 23:00 цагийн орчимд хадлан хадаж байсан 33 настай эрэгтэй Ө гэр рүүгээ мотоциклтой яваад сураггүй алга болжээ. 

Тус аймгийн Онцгой байдлын газрын алба хаагчид, ар гэрийнхний эрэн хайх ажиллагааг зохион байгуулж, наймдугаар 24-ний өдөр  “Алаг толгой” гэдэг газраас “Согогын гол” гэдэг газар хүртэл 12 км-т “Согог гол”-ын усаар завиар урсаж, 2 метрийн гүнд 3 удаа шумбаж, голын эрэг дагуу явганаар 11 км-т эрэн хайх ажиллагааг зохион байгуулсан боловч үр дүнд хүрээгүй тул мөн өдрийн 19:05 цагт ар гэрийнхэнтэй нь зөвшилцөж зогсоосон байна.

Мөн Өмнөговь аймгийн Даланзадгад сумын иргэн 10 настай эрэгтэй Х өчигдөр 14:00 цагийн орчим гэрээсээ явган гараад сураггүй болжээ.

Тус аймгийн Онцгой байдлын газрын Гал түймэр унтраах, аврах 21 дүгээр анги, Цагдаагийн газрын алба хаагчид, сумын Засаг даргын Тамгын газрынхан, ар гэрийнхний хамтаар наймдугаар сарын 25-ны 03:55 цагаас эрэн хайх ажиллагааг зохион байгуулсан байна.