Нийгмийн халамжийн үйлчилгээг цахимжуулах чиглэлээр хийж байгаа ажлын талаар сайд А.Ариунзаяа танилцуулав.

Засгийн газар 2020 -2024 онд хөдөлмөр, нийгмийн хамгааллын салбарыг бүхэлд нь цахимжуулж, иргэдэд ил тод, түргэн шуурхай, хүртээмжтэй үйлчлэх зорилт тавиад байна. Энэ хүрээнд эхний ээлжинд төрийн байгууллагуудад байгаа иргэний мэдээллийг тухайн иргэнээс шаардахгүйгээр халамжийн тэтгэвэр, тэтгэмж, хөнгөлөлт, тусламжтай холбоотой үйлчилгээг Наймдугаар сарын 26-ны өдрөөс буюу маргаашаас цахим хэлбэрээр үзүүлж эхэлнэ.

Ингэснээр иргэд олон баримт материал бүрдүүлэх, заавал халамжийн байгууллагад очих, тэтгэвэр, тэтгэмжийн мөнгөө авах гэж банкинд дугаарлах зэрэг шаардлагагүй болж байна.

“Нийгмийн халамжийн нэгдсэн систем” нэвтэрснээр тухайн иргэн ehalamj.mn, ТҮЦ машин, ebarimt аппликейшн ашиглан халамжид хамрагдах хүсэлтээ гаргах, өргөдөл, хүсэлт нь хэрхэн шийдвэрлэгдэж байгаад хяналт тавих боломжтой.

Тухайлбал 450 орчим мянган иргэн эхний ээлжинд “Насны хишиг”, жирэмсэн эхийн, 0-3 хүртэлх насны хүүхэд асарсны, ихэр хүүхдийн, өрх толгойлсон эх, эцгийн тэтгэмжийн мөнгөө цахим системээр дамжуулан авах аж.

Энэ талаар ХНХ-ын сайд А.Ариунзаяа: "Нийгмийн халамжийн мөнгөтэй холбоотой 12 үйлчилгээ байдгаас дөрвөн үйлчилгээг үзүүлэх боломжтой ehalamj.mn цахим хуудсыг өнөөдрөөс ажиллуулж эхэллээ. E-barimt болон ТҮЦ машинаар уг үйлчилгээнүүдийг бас авах боломжтой. 39 төрлийн материалыг бүрдүүлэхгүйгээр халамжийн үйлчилгээг цахимаар авах боломжтой болно.

Насны хишиг, хүүхэд асарсны тэтгэмж, өрх толгойлсон эцэг эхийн тэтгэмж, одонтой ээжийн мөнгө зэрэг үйлчилгээг хороо дүүрэг дээрээ очих шаардлагагүйгээр цахимаар бүртгүүлээд, өөрийн хүссэн дансандаа авах боломжтой болсон" гэлээ.