Улсын Онцгой Комиссын Шуурхай штабаас цаг үеийн асуудлаар мэдээлэл хийлээ.
УОК-ын өгсөн чиглэлийн дагуу Хонгконг руу тусгай нислэгийн гарц нээснээр, Малайз, Бангкок, Тайваньд байгаа нутаг буцах хүсэлтэй иргэдээ татан авах боломж нээгдэж байгааг ГХЯ-ны консулын газрын захирал Л.Мөнхтүшиг мэдээллээ.
Тэрээр "УОК-ын шуурхай штабаас өнгөрсөн хугацаанд тусгаарлах байрны бололцоог нэмэх, нэмсэн даруй иргэдээ татан авах, нислэгийн давтамжийг нэмэх чиглэлээр ажиллаж байгаа. Хонгконгоос транзит нислэг авах боломж бүрдэж байна. Зүүн өмнөд Ази, тэр дундаа Малайзаас өмнө нь транзит нислэгээр ирэхэд зардал их гардаг байсан. Хонгконгоор дамжин ирж байгаа иргэдийн хувьд, эцсийн цэг хүртлээ зөвхөн нэг тийз авах давуу тал бүрдсэн" гэлээ.
Мөн тэрээр УОК-ын гишүүд иргэдээ татан авах явцдаа авлига авсан тухай асуудалд "Авлига өгч байна, нэхэж байна гэдэг гомдол асуудал тав, зургадугаар сараас хойш гарч байгаа. Холбогдох байгууллагууд шалгалтыг хийж байгаа. Энэ хүнд үед хариуцлагагүй, хүний зовлонгоор ашиг хонжоо хайж байгаа бол иргэд авлига нэхсэн, өгсөн, авсан тухай мэдээллээ бидэнд эсвэл хууль хүчний байгууллагад баримттайгаар өгч шалгуулах хэрэгтэй байна. Ингэж байж авлига нэхсэн, авсан хүмүүст хариуцлага тооцуулах боломж нээгдэнэ. Маш олон өргөдөл байгаа. Гэвч шалгагдаад хариуцлага хүлээсэн хүн нэг ч алга" гэлээ.
ОБЕГ-ын дэд дарга, хурандаа Б.Ууганбаяр "Энд байгаа Улсын Онцгой комиссын нэг ч гишүүн авлигын өгөө, авааны асуудалд оролцоогүй гэдгийг албан ёсоор мэдэгдье" гэв.
УОК-ын шийдвэрээр наймдугаар сард гадаад улс орнуудаас иргэдээ татан авахаар 14 удаагийн тусгай үүргийн нислэг төлөвлөгдсөнөөс өнөөдрийн байдлаар найман удаагийн нислэг үйлдээд байна.
Хуваарийн дагуу:
- 08 дугаар сарын 20-нд Истанбул-Улаанбаатар
- 08 дугаар сарын 21-нд Франкфурт-Улаанбаатар
- 08 дугаар сарын 22-нд Сөүл-Улаанбаатар
- 08 дугаар сарын 24-нд Токио-Улаанбаатар
- 08 дугаар сарын 26-нд Франкфурт-Улаанбаатар
- 08 дугаар сарын 27-нд Сидней-Улаанбаатар чиглэлд тусгай нислэг үйлдэнэ.
