Японы сумогийн бүх цаг үеийн хамгийн тод од, Их аварга Хакухо Даваажаргал Монгол улсын иргэншлээс гарч, Япон улсын иргэн болж паспортаа гардан авчээ. Түүнийг 2007 онд дэвжээнийхээ эзний охинтой гэрлэж, хоёр хүүхдийн эцэг эх болсноос хойш Япон улсын иргэншилтэй болох асуудал яригдаж эхэлсэн бөгөөд хадам эцгийнхээ дэвшээг өвөлж авахын тулд заавал Японы иргэншилтэй болох ёстой хэмээн мэдээлж байсан билээ. 

Хакухо Даваажаргал өнгөрөгч 2019 онд Монгол Улсын иргэншлээс гарах хүсэлтээ Ерөнхийлөгч Х.Баттулгад өгсөн байдаг. Түүнээс хойш багагүй хугацаа өнгөрсний дараа сая Япон Улсын иргэний паспортынх нь зураг олон нийтийн сүлжээнд тавигдаж, манайхан ч уламжлал ёсоор дуулиан шуугиантай хүлээж авав. 

Учир нь паспортан дээр Даваажаргал гэдэг нэрийн оронд "Шо" гэдэг нэр тавигдсан явдал /Хакухо Шо/ монголчуудад төдийлөн таатай санагдахгүй байгаа бололтой. "Их аваргын удам тасрав" хэмээн харамслаа илэрхийлсэн хүн цөөнгүй байна.

Гэвч нэг зүйлийг сануулахад Их аварга Даваажаргал монголчуудад ямар ч өргүй. Хэрэв хэн нэгэнд өртэй гэвэл төрүүлж өсгөсөн аав ээждээ л өртэй байж таарна. Тиймээс Хакухо Японы иргэн болсон нь эх орноосоо урвасан хэрэг, эсвэл их аваргын удмыг тасаллаа гэх мэтээр буруутгах нь орчин үеийн глобалчлагдаж байгаа дэлхий ертөнц дээр байж боломгүй хэрэг юм.

Илүү соёлт ертөнцөд амжилт гаргаж, илүү их амжилтанд зорьж яваа нэгэндээ сүү өргөж сурцгаая. "Монгол" гэдэг энэ харанхуй нүхэндээ хамтаараа үхэж болохгүй биз дээ.