Монгол Улсын Хөдөлмөрийн баатар Ч.Пүрвээ нь 2020 оны 08 дугаар сарын 11-ний өдөр өвчний улмаас таалал төгсөж бидэнд нөхөж баршгүй том гарз тохиолоо.

Тэрээр 1945 онд Хөвсгөл аймгийн Их-Уул сумын Шивээ багийн Сант хэмээх газар малчин ард Чоёнгийн гэр бүлд төрсөн. 1964 онд Тариалан сумын 10 жилийн дунд сургууль төгсөж, 1964-1966 онд Налайхын Техник мэргэжлийн сургуульд комбайны машиннист мэргэжлээр төгссөн. Ч.Пүрвээ нь 1966 онд Налайхын Их уурхайд гезенк тосогч, мод оруулагч шалгагч, бэхэлгээчин, комбайны машиннист, бригадын даргаар 20 гаруй жил үр бүтээлтэй ажиллажээ.

Ч.Пүрвээ нь IV таван жилд 6 жил 3 сарын ажлыг, V таван жилд 6 жил 7 сарын ажлыг, VI таван жилд 6 жил 8 сарын ажлыг хийж ПК-3 комбайнаар огтолгоо хийх аргачлалыг боловсруулан өндөр бүтээлтэй ажиллаж байсан. Ч.Пүрвээ нь АИХ-ын депутатаар 2 удаа сонгогдож, МАХН-ын XVII, XVIII Их Хурлын төлөөлөгч, МҮЭ-ийн XI, XII, XIII Их Хурлын төлөөлөгчөөр сонгогдож байв.

Түүний ажил хөдөлмөр, амжилт бүтээлийг төр засгаас өндрөөр үнэлэн Сүхбаатарын одон, Хөдөлмөрийн гавьяаны улаан тугийн одон, Алтан гадас одон, 5, 6, 7, 8-р 5 жилийн гавшгайч, Улаанбаатар хотын Хөдөлмөрийн аварга, Тэргүүний уурхайчин цол тэмдэг, Налайх дүүргийн хүндэт иргэнээр өргөмжилж байлаа.

Их уурхайд олон жил идэвх зүтгэлтэй, санаачлагатай хөдөлмөрлөж өнөөгийн нийгмийг бий болгох, үүсгэн байгуулах, хөгжих түүхэн үйл явцад бодит хувь нэмрээ оруулсан гавъяаг нь үнэлж 1981 оны 07 дугаар сарын 09-ний өдрийн 232-р зарлигаар БНМАУ-ын Хөдөлмөрийн баатарын эрхэм цолоор шагнаж байжээ.

Ч.Пүрвээгийн хөдөлмөрч хичээнгүй, тууштай зарчимч эрхэм нандин зан чанар, эгэл даруу гэгээн дүр хамт олон бид бүхний сэтгэл зүрхэнд үеийн үед мөнхрөн үлдэх болно. Бурхан болоочийн үр хүүхдүүд, ах дүү, төрөл төрөгсдөд гүн эмгэнэл илэрхийлье.