Улсын онцгой комиссын Шуурхай штабаас цаг үеийн асуудлаарх ээлжит мэдээллээ өнөөдөр хийлээ. 

Хилийн хорио цээр тогтоосноос хойш Монгол улс авто болон агаарын замаар нийт 17211 иргэнийг эх оронд нь авчирчээ. 

Тодруулбал, БНСУ-аас 3000 орчим иргэн, Америк тивээс 960, Австрали тивээс 500, Европ тивээс 1250  Зүүн Өмнөд Азиас-500 авчирсан байна.

Энэ талаар  ГХЯ-ны Консулын газрын захирал Л.Мөнхтүшиг "Эх орондоо ирэх хүсэлтэй иргэдийн тоо буураагүй байна. Одоогоор дэлхийн 55 улсаас 12718 иргэн нутаг буцах хүсэлтээ өгсөн.

Гэхдээ одоо хүсэлтээ гаргасан хүмүүсийг шалтгаанаар нь ангилж үзвэл, УОК-оос тавьж байсан үндсэн таван шалгуураас гадна бусад шалтгаантай иргэд 70 хувийг эзэлж байна.

Өөрөөр хэлбэл, богино хугацааны визтэй болон нэн яаралтай буцах шаардлагатай, маш хүнд байдалд орсон иргэдийн тоо нэлээд багассан.

Нутаг буцах хүсэлтэй иргэдийн тоо харьцангуй их байгаа ч энэ нь Солонгос улсад байгаа манай иргэдийн сүүлийн өдрүүдэд гаргасан хүсэлт огцом нэмэгдсэнтэй холбоотой.

Долдугаар сарын эхээр 2400 орчим иргэн Сөүл дэх Элчин сайдын яаманд хандаад байсан бол өнөөдөр тэр тоо 4000 гарчээ.

Шалтгаан нь, УОК-ын шийдвэрийн дагуу буцах хүсэлтэй өгсөн иргэдийн  өргөдлийг огноогоор нь эрэмбэлээд олон нийтэд нээлттэй тавьсан учраас ойрын саруудад нутаг буцах хүсэлтэй иргэд оочерт нь орьё гэж их хандаж байгаа нь анзаарагдаж байна.

Мөн Европ болон Зүүн Өмнөд Азид байгаа иргэдийн хүндэтгэн үзэх шалтгаантай иргэдийн дийлэнх нь ирсэн буюу одоо хүсэлт гаргаад байгаа иргэдийн дийлэнх нь тухайн улс, бүс нутагт байнга оршин суух зөвшөөрөлтэй иргэд байгаа юм.

Наймдугаар сарын нислэгүүдээр ирэх иргэдийн тоо өндөр болж байгаа. Гэхдээ буцах хүсэлтэй иргэдийг нислэгт оруулсан ч зарим иргэд 20, 30-аараа ирэхээ болих асуудал гарч байгаа.

Тэр суудлуудыг хоосон ирүүлэхгүйн тулд дараа, дараагийн хүмүүсээ шуурхай зохион байгуулалт хийж татан авч байна.

Мөн өнгөрсөн хугацаанд хилийн чанд дахь иргэдийн санаачилгын байгууллагын зүгээс гадаадад хүнд байдалд орсон иргэддээ тусламж дэмжлэг үзүүлж байсан.

Бидэнд ирүүлсэн мэдээллээр дэлхийн 10 бүс нутагт манай улсын иргэд нэг, нэгэндээ хүнсний тусламж үзүүлэх, гэр орондоо байлгах зэргээр туслах олон төрлийн арга хэмжээ зохион байгуулсан" гэлээ.

Мөн тэрээр үргэлжлүүлэн "Улсын Онцгой комисоос энэ сарын 7-10-ны хооронд Алтанбулаг боомтоор иргэдээ татаж авах шийдвэрийг гаргасан. Тэгвэл тус боомтоор 286 иргэнийг нэвтрүүлсэн. Тэдний 81 нь Монгол Улсын иргэн. Үлдсэн нь ОХУ-ын иргэд байгаа юм.

Учир нь, тэд бүгд Монгол Улсад ажиллаж, амьдардаг ОХУ-ын иргэд, тэдний ар гэр болон сургуулийн багш, ажилчид юм. Харин БНХАУ-аас буцах хүсэлтэй илэрхийлсэн 169 иргэн байна. Тэднийг ойрын хугацаанд авч ирэх ажлыг зохион байгуулна. Өөрөөр хэлбэл, наймдугаар сарын 18-ны өдөр татан авахаар төлөвлөж байна" гэсэн юм.