Эрүүл мэндийн яамны ээлжит хурлын үеэр ХӨСҮТ-өөс коронавирусийн халдварын талаар ээлжит мэдээллээ хийлээ.
Долдугаар сарын 27-ны өдөр дөрвөн лабораторид нийт 686 хүний сорьцод шинжилгээ хийхэд 685 хүний сорьцод коронавирус илрээгүй. Харин өчигдөр Франкфурт-Улаанбаатарын нислэгээр ирсэн нэг иргэнээс коронавирус илэрчээ.
Өнөөдөр дөрвөн хүн эдгэрч, дараагийн шатны ажиглалт руу шилжиж байна. 33 настай эрэгтэй, Беларус улсын иргэн 66 настай эрэгтэй, ОХУ-ын иргэн 20 настай эмэгтэй, мөн нэг ОХУ-ын иргэн эдгэрлээ.
Нийт батлагдсан тохиолдол 289 болсноос 222 хүн эдгэрсэн. Эмчилгээнд байгаа 67 хүний биеийн байдлын хувьд 62 нь хөнгөн, 5 нь хүндэвтэр байна гэв.
ХӨСҮТ-ийн лаборатори хөндлөнгийн хяналтад хамрагддаг
Д.Нямхүү: Бид лабораторийн хөндлөнгийн хяналтад хамрагддаг бөгөөд COVID-19 халдварыг илрүүлэх шинжилгээний явцдаа хяналт хийлгэж байгаа. Хонг Конгоос эерэг, сөрөг нь мэдэгдэхгүй 16 сорьц ирсэн. Бид шинжлээд хариуг нь илгээнэ. Ингээд хяналтын лаборатори бидний хариуг тулгаж үзээд хариу өгнө. Ер нь томуу бусад халдварт өвчнийг илрүүлэх явцдаа байнга гаднаас хяналт авдаг. Австрали, Японы лабораториуд хөндлөнгийн хяналт хийж явдаг.