Өнгөрөгч долоо хоногийн бас нэг том дуулиан “С.Баярцогт хэргээ улайж, Д.Оджаргал ухаан алдан эмнэлэгт хүргэгдэв” гэдэг мэдээлэл байлаа. “Ноцтой мэдээ” сонинд нийтлэгдэж, мэдээллийн сайтуудаар цацагдсан уг материалд “С.Баярцогт хорихын өрөөнөөс хэргээ улайж эхэллээ. Тэр MCS-ийн Д.Оджаргалаас Зайсанд байр авснаа хүлээж, “Би ганцаараа биш, Ч.Сайханбилэг ч бас байр авсан” гэж мэдүүлжээ. С.Баярцогтын үнэнээ улайж эхэлснийг Д.Оджаргал захирал өөрийн эх сурвалжаар дамжуулж мэдээд бачимдсандаа ухаан алдаж, эмнэлгийн тоноглолтой онгоц дуудан гадаад руу ниссэн байна” гэх зэргээр бичсэн байв.

Гэвч “аз болж, гай болж” гэгчээр мөнөөх Д.Оджаргал нь тэр өдөр Монголд байж байхтай уг мэдээлэл давхцаж, “Централ Тауэр”-т түүнтэй тааралдсан бүх жиргээчид хамт авахуулсан зургаа жиргэсэн тийм нэг хөгжилтэй өдөр байлаа.

Эх сурвалжуудын хэлж буйгаар “Ноцтой мэдээ” сонинд нийтлэгдсэн уг мэдээллийг “Нирун фильм”-ын Н.Батсайханыг зохион байгуулсан гэлцэж байна. Харин юуны төлөө гэдэг нь сонирхолтой.

Ажиглагчдын таамаглаж буйгаар бол Оюутолгойн хөрөнгө оруулалтын гэрээ, Дубайн гэрээнээс болж хоригдсон С.Баярцогт, Ч.Сайханбилэг нарыг АТГ-ынхан тийм амар тавиад явуулчихгүй бололтой. Хүн нь байвал хүн нь олдоно гэдэгчлэн Оюутолгойн гэрээнээс “юм” олдоггүй юм гэхэд өөр ямар нэг зүйл анги заавал сонсгоно гэх. Магадгүй үүндээ бэлтгэх зорилготой хэвлэлийн пиар явж байхыг ч үгүйсгэх аргагүй л юм.   

Б.ГАЛ