Хүрэн шаргал өнгөтэй, нимгэн торгоор хийсэн хормогч хэлбэртэй хувцасны үлдэгдэл Архангай аймгийн угсаатны зүйн музейд хадгалагдаж байна. Энэ хувцасны үлдэгдэл нь 137х102 см хэмжээтэй ба ташааны урд талд хоёр сул танаастай. Бүсэлхий хэсэгт 8 см өргөн хөндлөн тууз хадаж, захад нь оёсон 4 см өргөн бүчээр бүсэлж өмсдөг байжээ.
Харин дараагийн зурагт мөрөвчтэй банзал маягийн хувцасны үлдэгдэл харагдаж байна. Хувцасны одооны өнгө нь хүрэн бор өнгийн дэвсгэр дээр хөх өнгийн утсаар нэхэж гаргасан навч цэцгэн хээтэй торго юм.
Хээний ерөнхий байдал нь тэгш хэмтэй дөрвөн угалзаар голлосон, навч цэцгийн дүрстэй, 7.3 см голчтой дугуй тэгтэй болно. Бүсэлхий, олон хуниастай дэрвэгэр хормой, мөрөвчийн хэсгийг тус тусад нь эсгэж шар өнгийн торгон утсаар цэвэрхэн залгаж оёсон байна. Хоёр мөрөвчийн зөвхөн баруун талын тасархай залгаатай хэвээр хадгалагдан үлджээ. Энэ хувцасны үлдэгдлийн хэмжээ нь 104х100 см ажээ
Энэхүү хувцсыг МУИС-ийн НШУИС-ийн Археологи Антропологийн тэнхимийн судлаач, оюутнууд 2011 онд Архангай аймгийн Хотонт сумын нутаг Олон дов хэмээх газарт байх Уйгурын хаант улсын үеийн булшнаас илрүүлэн олжээ.
Дээрх археологийн үнэт үзмэрүүд нь Архангай аймгийн музейн үзүүллэгийн танхимд дэглэгдсэн байна.