БНСУ-д коронавирусний цар тахлын улмаас өнгөрсөн тавдугаар сард ажилгүйдлийн түвшин сүүлийн 10 жилд байгаагүй өндөр хэмжээнд хүрлээ гэж тус улсын Статистикийн газар мэдээлжээ.
Энэ оны тавдугаар сард ажилгүйдлийн түвшин 4.5 хувьд хүрсэн нь 2010 оны нэгдүгээр сараас хойших хамгийн өндөр үзүүлэлт болжээ. Тухайн сард ажиллагсдын тоо 392 мянгаар буурч, 26.93 саяд хүрсэн бөгөөд ингэснээр уг үзүүлэлт гурван сар дараалан буурсан дүн үзүүлжээ.
Мөн өнгөрсөн сард 15-29 насны залуучуудын хөдөлмөр эрхлэлтийн түвшин 1.4 хувиар буурч, 42.2 хувьд хүрчээ. Коронавирусний тархалт түр болон өдрөөр ажиллагсдад хамгийн их нөлөөлж, ийм ажилтнуудын тоо тавдугаар сард 501 мянгаар буурсан байна.
Халдварын тархалтыг хязгаарлахын тулд гадуур гарахгүй байхыг хүмүүст уриалсан нь хэрэглээний зардал, аж ахуй нэгжүүдийн үйл ажиллагаанд ихээр нөлөөлжээ. Салбараар авч үзвэл, бөөний болон жижиглэн худалдаа, орон сууц, хүнсний үйлчилгээний салбарын олон ажилтан ажлын байраа алдсан бол нийгмийн халамж, загасны аж ахуйн салбарын ажиллагсдын тоо нэмэгджээ.
Эх сурвалж. МОНЦАМЭ
