ЭМЯ-ны Гадаад харилцаа, хамтын ажиллагааны хэлтсийн дарга Б.Янжмаа COVID-19 халдвар тархсан дэлхийн улс, орнуудын нөхцөл байдлын талаар танилцуулав.

Тэрбээр “ДЭМБ-ын Америкийн бүсийн захирал, Хойд болон Өмнөд Америк тивийн зарим улсад халдвар маш хурдацтайгаар огцом нэмэгдэж байгааг анхааруулжээ.

Тухайлбал, Мексик, Перу, Венесуэл, Бразил, Чили зэрэг улсад хурдацтай тархаж байна.

Өнгөрсөн Мягмар гарагт зөвхөн Перу улсад л гэхэд 4,000 гаруй шинэ тохиолдол нэмж бүртгэгдэн, нийт батлагдсан тохиолдлын тоо 200 мянгыг давж, дэлхийн хэмжээнд халдварын тоогоор наймдугаарт бичигдэх болов.  

Дэлхийн хэмжээнд өнөөдрийн байдлаар бүртгэгдээд байгаа 7.1 сая халдварын 3.3 сая нь Америкийн бүсэд бүртгэгдэж байгааг онцгойлон анхааруулсан байна” гэлээ

АНУ
АНУ-д зургаадугаар сарын 9-ний өдөр 17,500 гаруй тохиолдол, 550 нас баралт шинээр бүртгэгджээ.

Нийт халдварын тохиолдол тус улсын хэмжээнд 1.9 сая гаруй байгаагаас 110,900 гаруй хүн эндлээ.

Калифорни, Техас, Аризона зэрэг муж улсуудад халдвар өссөөр байна.

Тухайлбал, Калифорни мужид өнгөрсөн долоо хоногийн турш өдөрт л дунджаар 2.6 мянган тохиолдол шинээр бүртгэгджээ.

Бразил
Бразил улсад өчигдөр 32,000 тохиолдол, 1,272 нас баралт шинээр бүртгэгдсэн гэж тус улсын Эрүүл мэндийн яамнаас мэдээлжээ.

Мөн өдөр 6,000 гаруй хүн эдгэрсэн байна.

Өссөн дүнгээр Бразил улсын нийт батлагдсан халдварын тохиолдол 739,000, нас баралт 38,400-д хүрчээ.

Бразил улсын Дээд шүүхийн зүгээс тус улсын Эрүүл мэндийн яамыг халдварын нөхцөл байдал болоод тархвар зүйн мэдээллийг олон нийтэд ил тод, дэлгэрэнгүй мэдээлэх ёстой талаар анхааруулсан байна.

Иймд өчигдрөөс эхлэн халдварын талаарх бүх мэдээллийг Эрүүл мэндийн яам нь вэб хуудсандаа дахин байршуулж эхэлжээ.

ОХУ
ОХУ бүртгэгдсэн халдварын тоогоороо дэлхийн хэмжээнд гуравдугаарт бичигдэж байна.

Өчигдөр тус улсад 8,590 гаруй тохиолдол шинээр бүртгэгдэж, нийт халдварын тохиолдлын тоо 485,200 гаруйд хүрчээ.

Мөн ОХУ-д бүртгэгдсэн нас баралтын тоо 6,142 болсон байна.

Япон
Номхон далайн баруун бүсийн Япон улсад зургаадугаар сарын 9-ний өдрийн байдлаар 21 шинэ тохиолдол бүртгэгдсэн нь бүгд дотоодын халдвар байна.

Мөн өдөр шинээр эндэгдэл гараагүй.

БНСУ
БНСУ-д өнгөрсөн 24 цагийн хугацаанд 50 тохиолдол, хоёр нас баралт шинээр бүртгэгдлээ.

Шинэ тохиолдлуудын 43 нь тус улсын дотоодын халдвар байгаа юм.

Мягмар гарагийн байдлаар:

Тус улсын зарим аймгийн сүмүүдээс голомттой батлагдсан тохиолдлын тоо 86
Эрүүл мэндийн төвийн жижиглэнгийн худалдааны төвөөс голомттой халдвар 68,
Шөнийн клубийн голомтоос 277
Цахим худалдааны ложистик төвөөс 139
Ширээний теннисний клубийн шинэ голомтоос өссөн дүнгээр 58 тохиолдол батлагдаад байна
гэж БНСУ-ын Өвчний хяналт, сэргийлэлтийн төвөөс мэдээлжээ.

БНХАУ
БНХАУ-ын Эрүүл мэндийн үндэсний хорооны мэдээлснээр Мягмар гарагт тус улсын хэмжээнд гаднаас зөөвөрлөгдсөн гурван шинэ тохиолдол, шинж тэмдэггүй халдварын таван тохиолдол бүртгэгдсэн байна.

Одоогоор тус улсад шинж тэмдэггүй 150 тохиолдлыг илрүүлж, эмнэлгийн хяналтад ажиглаж байгаа аж.