Ойр тойрны олон хүн сонгууль хүртэл цагийн ажил хийж байна аа. Хорь гаруйхан хоногт 500 мянган төгрөг олж байна гээд өөрсдөө ч таашаалтай явна. Хариуцсан хэдэн айлдаа шуудан хүргээд л болдог гэх. Аан бас, оюутан голдуу хүүхдүүд сонгуулийн сурталчилгааны туг намируулж орой алхаж байгаа харагдсан. Тэд ч гэсэн 300 мянган төгрөг авах сурагтай. Ойрын өдрүүдэд Монголын улс төрийн амьдралд өрнөж байгаа үйл явц буюу сонгууль дагасан цагийн ажил энэ. Бичдэг, туурвидаг, биеэрээ үлгэрлэдэг хүмүүс ч тусгай ханштай цагийн ажил хийж л яваа гэнэ. Ер нь жирийн цагт ч гэсэн энэ мэт цагийн ажил элбэг бол айл өрхийн амьдралд асар их нэмэртэй дээ. Зуны амралтаараа оюутнууд, боломжтой цагаараа ахмадууд гээд идэвхтэй хөдөлмөр эрхлэх сонирхол хэнд ч бий. Ажил алба эрхэлдэг хүмүүс ч амралтын өдөр эсвэл оройн цагаар хийж болох ажил байвал хийнэ дээ.

Солонгост амьдардаг монголчууд өдрийн хагаст багтаан айл нүүлгээд овоо хэдэн вон олчихдог. Үйлчилгээний салбар нь хөгжсөн улс болохоор хэл, яриа шаардахгүй хийж болох ажил ч арвин. Цагийн ажил байж гэмээнэ санхүүгийн хувьд хүмүүс хараат биш, ядуу байх үндэсгүй болно. Жинхэнэ залхуучууд л ийм улсад ядуу байх болов уу.

Тэгвэл манайд энэ мэт цагийн ажил хэзээ дэлгэрэх бол оо? Хөдөлмөрийн хөлсний доод хэмжээтэй дүйх цэвэрлэгээний ажилд уягдаж, түүнээсээ татвар, төлөөс өгчхөөд өөрт ногдох багахан мөнгөөр арай ядан амьдарч байгаа ажилсаг эгч нарт тохирсон цагийн ажил олон болоосой.
Оффисын ажил хийдэг ч онцгой шаардлага гарвал биеийн хүчний хөдөлмөр эрхэлж, гэр бүлдээ дэм болох сонирхолтой хүмүүс ч бишгүй бий. Ор мөргүй хоосон бус олигтойхон хөлстэй цагийн ажлын тухай л хэлээд байгаа юм.

Ам ангайгаад бэлэн мөнгө гуйхгүй ээ, хийх ажлыг нь бий болгоод орхи. Тэгвэл та нарын хиур тугийг барьж дөрвөн жилд нэг ходийдог бус цаг ямагт бэлэн байдаг цагийн ажлаа тэд хийнэ. Харин та бүхэн зөв яваа бол үзэл бодол нэгтэй нөхөд чинь үнэгүй ч сурталчлаад гүйнэ байх.
Цагийн хөлс нь тодорхой, хөдөлмөрлөх нөхцөл нь нээлттэй, өдөртөө орлого нь орчихдог ажилтай бол ядуу амьдрахгүй л хүмүүс дээ, монголчууд.

ЭХ СУРВАЛЖ: "АРДЧИЛАЛ ТАЙМС" СОНИН