Өчигдөр буюу зургадугаар сарын 1-ний байдлаар Монгол Улсад коронавирусийн сэжигтэй тохиолдол бүртгэгдсэнгүй. Энэ өдөр нийт 212 хүнд шинжилгээ хийхэд коронавирусийн халдвар илрээгүй байна.
ХӨСҮТ-ийн Тандалт, судалгааны албаны дарга А.Амбасэлмаа:
-"Тандалтын зорилгоор гурван хүнд /Завхан аймгийн Эрүүл мэндийн төв болон өрхийн эрүүл мэндийн төвөөс сорьцыг цуглуулжээ/,
-ХӨСҮТ-д тусгаарлагдсан найм,
-Ажиглах байранд тусгаарлагдсан нэг хүний давтан шинжилгээ
-Истанбул-Улаанбаатар чиглэлийн онгоцоор ирсэн зорчигчдод шинжилгээ хийхэд коронавирус илрээгүй. Бид олон улсын зөвлөмжийн дагуу зорчигчдыг ирмэгц нь мөн 7, 14 хоногийн давтамжтайгаар шинжилгээ хийж байна.
-Алтанбулаг боомтоор орж ирсэн ачаа тээврийн 10 жолоочид шинжилгээ хийхэд коронавирусийн халдвар илрээгүй" гэв.
Өнөөдрийн байдлаар /2020.06.02/ Монгол Улсад гаднаас зөөвөрлөгдөн орж ирсэн коронавирусийн халдварын 185 тохиолдол бүртгэгдэж, 44 хүн эдгэрч, 141 нь ХӨСҮТ-д эмчлэгдэж байна.
Өвчилсөн хүмүүсийн эмчилгээний ор хоног нь 14-53 буюу дунджаар нэг өвчтөн 30 хоног эмчилгээ хийлгэж байгаа аж. Өвчтөнүүд 5-65 насныхан бөгөөд 5-15 настай таван хүүхэд байна.
Илэрч буй гол эмнэлзүйн шинж тэмдэг:
- толгой өвдөх,
- дотор муухайрах,
- булчин өвдөх,
- сульдах,
- ханиалгах,
- амьсгал давчдах
Эдгэрсэн 13 хүнийг ажиглалтаас бүрэн гаргажээ
Коронавируст халдвараар өвчлөөд эдгэрсэн хүмүүсийг ХӨСҮТ-өөс гаргаж, Энх саран сувилалд 14 хоног тусгаарлан ажиглаж, хоёр удаа шинжилгээ авч, гэрийн ажиглалтад гарсан үед нь мөн шинжилгээ авч, ажиглалтаас гаргаж байгаа.
Өнөөдрийн байдлаар эдгэрсэн 16 хүн сувилалд тусгаарлагдсан бол 15 хүн гэрийн ажиглалтад байна. Харин эдгэрсэн 13 хүнийг ажиглалтаас бүрэн гаргажээ.
Мөн ХӨСҮТ-д тусгаарлагдсан иргэдийн хоёр нь жирэмсэн эх бөгөөд тэдний биеийн байдал хөнгөн байгаа гэв.
