ЭМЯ-ны Тандалт, шуурхай удирдлагын хэлтсийн дарга Д.Нарангэрэл коронавирст халдварын тархацын талаар цаг үеийн мэдээллээ хийлээ.
Коронавирусийн халдвар дэлхийн 216 улс, нутаг дэвсгэрт тархсан бөгөөд сүүлийн 24 цагт 116 мянган хүн шинээр халдвар авчээ. Өчигдөр ОХУ-д нэг өдрийн дотор 8,849 хүн халдвар авч, нас баралт мөн нэмэгдсэн байна. Манай улстай хиллэдэг Тува, Буриад, Читэд өвчлөлийн тархац нэмэгдэж байгаа тул иргэд мэргэжлийн байгууллагаас өгч байгаа зөвлөмжийг дагахыг уриаллаа.
Д.Нарангэрэл:
-Өнөөдрийн байдлаар манай улсад гаднаас зөөвөрлөгдөн орж ирсэн 141 тохиолдол бүртгэгдээд байгаагаас 30 нь эмчлэгдэн гарч, 111 хүн ХӨСҮТ-д эмчлүүлж байна.
Сүүлийн 24 цагт 3 ажиглалтад орж, 263 хүн гэрийн ажиглалтад шилжлээ. Ажиглах байранд 1,394 хүн байна. Тэдний 182 нь архаг хууч өвчтэй, 41 их эмч, 36 резидэнт эмч эмнэлгийн тусламж үйлчилгээ үзүүлж байна гэв.
Мөн 11 их эмч орон нутгийн 13 галт тэргэнд ажиллаж, 5127 зорчигчид тандалт судалгаа хийхэд сэжигтэй тохиолдол илрээгүй байна.
Шуурхай штабын 119 дугаарын утсанд сүүлийн 24 цагт гадаадаас 11 иргэн коронавирусийн эмнэл зүй, зөвлөгөө мэдээллийг авчээ.