Монгол Улсын Ерөнхийлөгч Х.Баттулга өнөөдөр Монголын эдийн засгийн форумын Үндсэн чуулганыг нээж үг хэлэв. Сануулахад энэ удаагийн эдийн засгийн чуулганыг манайх “Хүчээ нэгтгэе” уриан дор зохион байгуулж байгаа. Энэ тухай Ерөнхийлөгч “Хөгжлийн төлөө хүчээ нэгтгэхийн тулд бидэнд нухацтай бодох зүйл байна. Сонсоход бэрх гашуун үнэнийг ярихаас аргагүй цаг мөч тулгарч байна” гэлээ. Түүний хамгийн эхэнд хэлсэн "гашуун бөгөөд үнэн" үг бол “Жил бүр хэдэн хүн цуглаад ханатлаа цэцэрхэж, ухаалаг дүр эсгэж байгаад тардгаа болимоор байна” гэсэн явдал.

Үнэндээ ч манай Засгийн газрууд “Монголын эдийн засгийн чуулган”-ыг найм дахь жилдээ, жил алгасалгүй зохион байгуулж байгаа билээ. Харин тэр хооронд эдийн засаг яаж сайжирсан билээ? 2009 онд Оюутолгойн гэрээг байгуулсан үеийнхээс хойш лав нэг ч алхам урагш ахисангүй. 2015 онд Оюутолгойн далд уурхайн хөрөнгө оруулалтыг эхлүүлэхээр гарын үсэг зурсан Ч.Сайханбилэгийгээ шоронд хийчихсэн. Тиймээс жил болгон цаг, хөрөнгө үрж хийдэг Эдийн засгийн чуулганд яг юунд хэрэгтэйг бүү мэд.

Соошл хэрэглэгчид "Өвөл болохоор хүйтэн болдог" гэж хэлсэн УИХ-ын гишүүн М.Билэгтийг энэ парламентын түүхэн дэх хамгийн "Үнэн үгтэй аниа"-гаар тодруулаад байгаа. Харин өнөөдөр Эдийн засгийн форум дээр Ерөнхийлөгчийн хэлсэн үг (“Жил бүр хэдэн хүн цуглаад ханатлаа цэцэрхэж, ухаалаг дүр эсгэж байгаад тардгаа болимоор байна”) эрхэм гишүүнийг хол орхиж, энэ цаг үеийн “хамгийн үнэн үгтэй агаа” болов.

Б.ГАЛ