Энэ сарын 16 буюу ирэх долоо хоногт багтаж улс төрийн намууд нэр дэвшигчдээ тодруулах ёстой. Тиймээс гадагшаа төдийлөн ил гараагүй ч МАН доторх нэр дэвшигчдийн өрсөлдөөн хурцдаж, нэлээд хорон арга луу шилжиж байгаа бололтой. Мэдээллийн сайтууд дээр үзэгдэж эхэлсэн нэр дэвшигчдийн талаарх зарим нэг дүгнэлт, төрөгдлүүдийг аваад үзвэл МАН-ын эмэгтэйчүүд ч бас энэ “тулаанд” орсон байна.

Мэдээж үүний өмнө улс төрийн намууд тойргуудад нэр дэвшигчдээ зоохоор урьдчилсан байдлаар тандалт судалгаа явуулжээ. Тухайлбал, МАН, АН-аас хийсэн судалгаагаар Чингэлтэй дүүрэгт тус тойргоос сонгогдсон УИХ-ын гишүүн, Өргөдлийн байнгын хорооны дарга М.Оюунчимэг хамгийн өндөр рейтингтэй гарсан юм байна. Өнгөрсөн хугацаанд УИХ-ын Өргөдлийн байнгын хороог толгойлохдоо авч хэрэгжүүлсэн хийсэн ажилтай нь харьцуулахад байх л ёстой үр дүн.

Өргөдлийн байнгын хорооноос утааг бууруулах чиглэлээр авч хэрэгжүүлсэн арга хэмжээ, утаагүй түлшний хэрэглээн дээр тавьсан хяналт, мөн дээр нь нийслэлийн гэр хорооллуудаас анхлан Чингэлтэй дүүрэгт байгуулсан Дэд бүтцийн станц, ногоон хөгжлийн төсөл гэх мэтчилэн олон асуудал, шийдлийн урд нь М.Оюунчимэг гишүүн эмэгтэй хүн байтугай эр хүнд чангадсан ачаа үүрч зүтгэсэн нь үнэн. Гэвч сонгууль дөхөөд ирэхийн цагт энэ бүхэн тус намын эмэгтэйчүүдэд төдийлөн таатай санагдахаа больсон бололтой.

Тиймээс саяхнаас “ЖДҮ зээлтэй нэр холбогдсон шалтгаанаар М.Оюунчимэгийг намын дарга нь нэр дэвшүүлэхгүй байж магадгүй” гэх мэтчилэн зарим нэг сайтаар хөөрхөн “чимхээд” эхэлжээ. /уг нь АТГ асуудлыг нь шалгаад "тийм юм байхгүй" гээд хэлчихсэн/ “Эр хүн эрх хүндээ хайртай, эм хүн эм хүндээ дургүй” гэдэг билүү.

Ирэх сонгуулиар нэр дэвшигчид томсгосон 29 тойрогт /нэмж 3 тойргийг шинээр байгуулсан/ нэгээс илүү мандат дээр өрсөлдөнө. Харин МАН тус намын дүрэмд заасны дагуу нэр дэвшигчдийн 25 хувь буюу 16-г нь намынхаа эмэгтэйчүүдээс дэвшүүлэх ёстой. Үлдсэн 13 тойрогт дан эрчүүд дэвшинэ гэсэн үг. Тийм болохоор эрэгтэйчүүдийн хувьд эмэгтэй квоттойгоо тойрог булаацалдах шаардлага бол төдийлөн байхгүй. Харин эмэгтэйчүүд дотроосоо бие биенээ дэгээдэж эхэлсэн болж харагдаж байна.

Яг үнэндээ энэ удаагийн парламент хамгийн олон эмэгтэй гишүүнтэй, эмэгтэйчүүд нь түүхэнд байгаагүй хамгийн муу нэртэй. Үүн дотор арай дөнгүүр, зарим тал дээр эрчүүдээсээ ч илүү тодорч харагдаж байгаа гуравхан эмэгтэйн нэг нь АН, хоёр нь МАН-ынх. Хоёулаа сэтгүүлч мэргэжилтэй.

Д.Сарангэрэлийн хувьд “монголчуудын ... хувь нь тэмбүүтэй” гэж зарласнаасаа бол хэвлэл, соошлаар гайгүй сайн балбуулж, барцадаа арилгаж аваад одоо коронавирусын эсрэг гардан тулаанд ороод байгаа. Дэлхийн даяар тархаж байгаа цар тахалын аюулыг монголчууд дотооддоо хазаарлаж, гаднаас оруулж ирсэн тохиолдлуудаа гадагшаа алдахгүй бариад байж чадсан нь Д.Сарангэрэлийн хувьд нэмэх оноо болж байна. Одоохондоо монголчууд улс орныхоо эрүүл мэндийн салбарын ажлыг цар тахалтай хийж буй тэмцлийн үр дүнгээр хэмжиж байна гэсэн үг. Дээр нь намын дэргэдэх эмэгтэйчүүдийн байгууллагыг тэргүүлж байгаа.

Тиймээс нэг талаас сонгуулийн санал хураах өдөр хүртэл энэ үр дүнгээ хадгалж чадвал Д.Сарангэрэл сайдын хувьд ногоон гэрлээр сонгогдож мэдэхээр байна. Харин нөгөө талаас нөхцөл байдлаа нягтлаад үзвэл яг өнөөдрийн нөхцөлд Эрүүл мэндийн сайд нь сонгуульд нэр дэвшээд, сурталчилгаа хийгээд явах нь улс төрийн хувьд хариуцлагагүй зүйл ч байж мэднэ. Эрх барьж байгаа нам, Засгийн газар нь нөхцөл байдлаа хэрхэн үнэлэхээс л шалтгаалах юм даа.

Харин М.Оюунчимэгийн хувьд зөвхөн утаагүй тулшнийхээ тухай яриад явахад л бараг гишүүн болчихоор. Тиймээс түүний өнгөрсөн дөрвөн жил Чингэлтэйд дэвссэн фонн дээр хөлс урсгалгүй босоод ирэх хүсэлтэй өрсөлдөгчид нам дотор нь цөөнгүй байдаг бололтой. 

Тийм биш бол А.Ундраа, Б.Ундармаа, Дорноговиос Г.Мөнхцэцэгийн, Өмнөговиос Н.Амарзаяагийн гээд аль хэдийн тавиад туучихсан тойргууд зөндөө л байна шүү дээ. 

Б.ЗАЯА