Америкийн поп од Мадонна коронавирусийн шинжилгээ өгөхөд биеэс нь эсрэг биет илэрсэн тухай өнгөрөгч долоо хоногт сошиал хуудсаар мэдээлсэн. Уг мэдээллийн дараа хэвлэлүүдээр түүний тухай зүсэн таамагласан мэдээллийг гарах болсон тул тэр өчигдөр Инстаграм хуудсандаа хэрхэн халдвар авсан тухайгаа тайлбарласан байна.
Мадонна энд “Миний бие одоо эрүүл. Эсрэг биет илэрсэн нь коронавирусийн халдвар авч байсны шинж тэмдэг юм. Би сар хагас орчмын өмнө аялан тоглолтоо Парист дуусгах үеэр халдвар авсан нь тодорхой байна. Тухайн үед надаас гадна манай багийн хэд хэдэн уран бүтээлч өвдсөн юм. Бид бүгд их хүнд ханиад хүрлээ гэж тухайн үед бодож байв. Бурхны авралаар өнөөдөр бид бүгд эрүүл саруул байна” хэмээн бичжээ.
Түүний дэлхийг тойрсон аялан тоглолт Францад хөл хорио тогтоохын өмнө Парист өндөрлөсөн. Мөн поп од коронавирусийн эсрэг вакцин бүтээх үйлсэд нэг сая доллар хандивлажээ.
Цар тахлыг эсэн мэнд даван гарсан поп од Холливүүдийн од Роберт Де Ниро, Жэйн Фонда, Моника Беллучи нарын 200 алдартантай нэгдэж, тахлын аюул өнгөрсний дараа дэлхий ертөнцөд ээлтэй шинэ хэв маягаар амьдарч эхлэхийг хүмүүст уриалсан байна.
Алдартнууд, цар тахал нь хүн төрөлхтний хувьд томоохон гамшиг болсон ч үүнийг алдаагаа засах боломж хэмээн үзэж, үр ашиггүй хэрэглээгээ багасган, байгальд ээлтэй амьдралын шинэ хэв маягт шилжихийг уриалжээ.
Эх сурвалж: AFP
Сэтгэгдэл (1)