Өнөөдөр Улсын Онцгой комиссын 20-р хуралдаан болж өндөржүүлсэн бэлэн байдлын хугацааг тавдугаар сарын 31-н хүртэл сунгах шийдвэр гаргалаа.

Энэ талаар УОК-ын дарга, Шадар сайд Ө.Энхтүвшин мэдээлэл хийв. 

Тэрээр "Гамшгаас хамгаалах өндөржүүлсэн бэлэн байдлын хугацааг сунгах эсэх асуудлыг ярилцлаа. Нөхцөл байдал улам хүндэрч байна. Хойд хөрш ОХУ-д байдал улам хүндэрч, 24 цагийн дотор шинэ тохиолдлын тоо нь 2,896-аар нэмэгдсэн байна. АНУ-д коронавирусийн халдварын тохиолдлын тоо нь 1 сая гарсан. Түүнчлэн БНХАУ, Турк, Солонгос, Япон зэрэг улсуудын байдал амаргүй хэвээр байна. Манай улсын хувьд халдварын тоо нэмэгдсээр 38 болсон. Сүүлийн үед халдвар авсан хүмүүсийн дотор эхний хоёр удаагийн шинжилгээгээр "сөрөг" гарсан ч гурав дахь удаагийн шинжилгээгээр "эерэг" гарч байна. 14 хоногийн дараа ч илэрч байгаа нь вирус хэр хөнөөлтэйг харуулж байгаа юм. 

Долоо дахь удаагийн эрсдлийн үнэлгээг хийхэд Монгол улсад вирус тарах МАШ ӨНДӨР эрсдэлтэй гэж гарсан. Тиймээс УОК-ын хурлаас гамшгаас хамгаалах өндөржүүлсэн бэлэн байдлын хугацааг 2020 оны тавдугаар сарын 31-нийг дуустал үргэлжлүүлэх нь зүйтэй гэх шийдвэрлэлээ. Ингэснээр олон улсын нислэгийг түр зогсоосон хугацаа мөн сунгагдаж байна.

Энэ хугацаанд гадаад улсаас иргэдээ татах ажлыг шат дараатайгаар зохион байгуулна. Ойрын хугацаанд гурван нислэг хийнэ. БНСУ руу хоёр нислэг хийх бөгөөд нэг нислэг нь зөвхөн бусад улсаар дамжин ирэх иргэдийг татах юм. Хэдийгээр тусгай үүргийн нислэгт суух иргэдийг шинжилгээнд хамрагдсан байх шаардлагыг тавьж байгаа ч бусад орноос дамжин ирж байгаа иргэд шинжилгээ хийлгэж чадаагүй." гэв.