Монголбанкнаас зээлээ төлөх боломжгүй болсон иргэдийн зээлийн үлдэгдлийн эргэн төлөлтийг 12 сараар сунгах шийдвэр гаргаад байгаа. Үүнтэй холбоотойгоор ипотек, цалин, тэтгэвэр болон бусад хэрэглээний зээл хэлбэрээр иргэнд олгосон зээлийн хувьд хуваарийн дагуу эргэн төлөлт хийлгүй 15 хоногоос хэтэрсэн тохиолдолд зээлийн чанарыг бууруулдаг байсныг 90 хоног хүртэл сунгах шийдвэрийг гаргасан  билээ.(https://www.mongolbank.mn/news.aspx?id=2472&tid=1).

Энэ дагуу төв банкны Мөнгөний бодлогын хороо энэ сарын 13-нд хуралдаж, хэрэглээний зээлд мөрдөгдөх өр, орлогын харьцаа (60:40)-ны болон хугацаа (30 сар)-ны дээд хязгаараас шалтгаалан нөхцөл өөрчлөх боломжгүй байгаа, эргэн төлөлтийн хүндрэлд орчихсон байгаа хэрэглээний зээлийн хугацааг 12 хүртэлх сараар 1 удаа сунгах боломжийг банкууд, зээлдэгчдэд олгохоор шийдвэрлэсэн байна. Энэ шийдвэр нь дөрөвдүгээр сарын 14-ний өдрөөс хэрэгжиж эхэлжээ. 

Ингэхдээ зээлдэгч банктайгаа тохиролцон зээлийн хугацааг сунгахдаа үндсэн төлбөрөөс чөлөөлөгдөж буй хугацаанд хүүгийн төлбөрийг төлөхгүйгээр хойшлуулсан тохиолдолд хуримтлагдсан хүүгийн төлбөрийг үлдэгдэл хугацаанд тархаан байршуулах (хүүг капиталжуулах) дүнгээр өсч болно. Бусад тохиолдолд өөрчлөлт орохгүй юм байна.

Орлого нь тасалдаж, зээлийн эргэн төлөлтөө хийхэд хүндрэл учирсан зээлдэгчид банканд хүсэлтээ гарган, нөхцөлөө өөрчлөх боломжтой ч банкны зүгээс байгууллагын тодорхойлолт, дансны хуулга болон бусад холбогдох материалууд дээр үндэслэн орлого тасалдсаныг тогтоох аж.

Энэ нь нэг удаагийн арга хэмжээ бөгөөд хэвийн зээлийн ангиллыг өөрчлөхгүй байх 90 хоногийн хугацаанд (7-р сарын 31-нийг хүртэл) багтаан банкууд зээлдэгчид тохиролцон эргэн төлөлтийн хуваарийг шинэчилнэ. Үүний үр дүнд зээлдэгчдийн зээлийн сарын төлбөр буурч, зээлдэгчийн гар дээр үлдэх орлого нэмэгдэнэ гэдэг тайлбарыг Монголбанкнаас өгч байна.

Мөнгөний бодлогын хорооны дээрх шийдвэрт үндэслэн Монголбанкны ерөнхийлөгч тушаал гаргаж банкуудад хүргүүлсэн тул хэрэглээний зээлийн хугацааг сунгах, нөхцөл өөрчлөх шийдвэр нь 4-р сарын 14-ний өдрөөс эхлэн бүх банкууд дээр хэрэгжих юм байна. 

Харин орлогын хэмжээнд өөрчлөлт ороогүй бөгөөд зээлийн эргэн төлөлтийг хуваарийн дагуу төлөх боломжтой зээлдэгчдийн хувьд энэ хөнгөлөлт хамаарахгүй гэлээ.

Сануулахад, хэрэглээний зээлд иргэдийн цалингийн зээл, тэтгэврийн зээл, малчны зээл, автомашины зээл, лизинг, кредит картын зээл болон дээрхтэй төстэй бусад зээлийн гэрээ, хэлцлийг хамруулдаг байна.

Эх сурвалж: Монголбанк