ХЭҮК-ийн дарга Ж.Бямбадоржийг үүрэгт ажлаас нь чөлөөллөө. Чөлөөлөгдөх хүсэлтээ өгөхдөө “эрүүл мэндийн шалтгааны улмаас тэтгэвэртээ гарлаа” гэсэн авч цаана нь өөр шалтаг, шалтгаан байж болохоор харагдаж байна.

Учир ирэх тавдугаар сарын 25-наас мөрдөх Үндсэн хуулийн нэмэлт өөрчлөлтийг мөрдөж эхэлнэ. Үндсэн хуулийн нэмэлт өөрчлөлтийг мөрдөж эхэлсний дараа УИХ-аас томилдог бүх албан тушаалтнуудыг дахин болон шинээр томилох учиртай.

Гэтэл, ердөө сарын дараа ажлаа өгөх байсан ХЭҮК-ийн дарга яагаад өнөөдөр гэнэт “тэтгэвэртээ гарах” хүсэлтээ өгсөн байж таарах вэ?

Хоёрдугаарт, иргэн Г.Загдаа жилийн өмнө хийсэн бичлэгээ яагаад гэнэт өнөөдөр задлах болов? Гэдэг ч бас сонирхолтой. Тэгэхээр асуудал гогцоо соошлаар тарсан “гөлөг, нохой”-ны тухай ярианд байгаагүй байж ч болох юм. Үндсэн хуулийн нэмэлт өөрчлөлт мөрдөгдөж эхлэхээс өмнө ХЭҮК-ийн даргыг шинээр томилох хүсэл өөр хэн нэгэнд байж, түүнийхээ төлөө Г.Загдааг ашигласан байж болох уу? Дээшээгээ их л татлаа, түлхээтэй хүн гэлцэх юм билээ. Баримт материал ч их бий гэж Ж.Бямбадорж дарга өөрөө ажлаа өгөхийн өмнөхөн ам нээгээд амжсан.

Мөн түүнийг чөлөөлөх асуудлыг хэлэлцэх үед нэг УИХ-ын гишүүн ХЭҮК-ийн талаар муу үг хэлээгүй. Тэр ч байтугай “Араа шүдгүй байсан ХЭҮК-ийг өөрчилж, хуулийг нь батлуулахын төлөө чармайж ажилласан” хэмээн магтаж магтаж явуулна лээ. Хүний эрхийг хамгаалагчийн “хүний мөсгүй” явдлын талаар нэг ч хүн дурсаагүй. Тэгсэн атлаа “сарын дараа ажлаа өгөх хүнийг чөлөөлөөд яахав дээ” гэж нэг нь ч дуугараагүй шалтгаан бас юу байх вэ?