Манай улсад коронавирусийн 33 дахь тохиолдол бүртгэгдлээ. Энэ талаар ХӨСҮТ-ийн захирал Д.Нямхүү өнөөдөр мэдээллээ. 

Д.Нямхүү:

-"Өчигдөр хоёр лабораторид 76 хүний шинжилгээ хийгдсэн. Цэргийн төв эмнэлэгт тусгаарлагдсан 55 хүнд давтан шинжилгээ хийхэд коронавирус илрээгүй. Тандалтын зорилгоор 4 хүнд коронавирус илрээгүй. ХӨСҮТ-д тусгаарлагдсан 17 хүнээс шинжилгээ авахад нэг хүнээс коронавирус илэрлээ.

Халдвар илэрсэн иргэн нь ОХУ-аас Алтанбулагийн боомтоор орж ирсэн Төмөр замын дээд сургуулийн оюутан. Ингэснээр 33 дахь тохиолдол бүртгэгдлээ. 

Сайн мэдээ гэвэл өчигдрийн байдлаар /2020.04.19/ улсын хэмжээнд коронавирусийн сэжигтэй тохиолдол шинээр бүртгэгдсэнгүй. ХӨСҮТ-д эмчлэгдэж байгаа хүмүүсээс нэг хүн эдгэрч, дараагийн тусгаарлалтад шилжлээ. Өвчтөнүүдийн биеийн байдал тогтвортой байна. Зарим нь сайжирч байна. Мөн хэд хэдэн хүн уушгины хатгаатай байгаа. Эмч нар хяналт шинжилгээгээ үргэлжлүүлж байна" гэв.

Сүүлийн мэдээллээр COVID-19 халдвар дэлхийн 213 улс, орон бүс нутгийг хамарч, нийт 2.4 сая хүн өвчилжээ. Мөн өвчний улмаас дэлхий дахинд нийт 1.6 сая хүн эмнэлэгт хэвтэн эмчлүүлж байна.

ЭМЯ-ны хэлтсийн дарга Д.Нарангэрэл:

-“Сүүлийн үед ОХУ-д халдвар нэлээд нэмэгдэж байна. Тус улсад 24 цагийн дотор 6000 гаруй шинэ тохиолдол бүртгэгдэж, 41 хүн нас барсан байна.

Халдвар авсан хүмүүсийн 60 гаруй хувь нь хөнгөн хэлбэрээр өвчилж байгаа байгаа ч сүүлийн өдрүүдэд нас баралтын тоо огцом нэмэгдсэн байна.

ОХУ олон хүнийг шинжилгээнд хамруулж, хөнгөн балархай хэлбэрийг эрт илрүүлж байгаа учраас өвчлөлийн тоо нэмэгдэж байгаа бөгөөд өвчтөнүүдийг хяналтдаа авч чадаж байна гэсэн дүгнэлтийг мэргэжилтнүүд хийсэн байна.

Мөн эмч, эмнэлгийн ажилчдын хамгаалах хувцас хэрэгсэл хүрэлцэхгүй байгаа учир нэг сая хувцсыг БНХАУ-аас авахаар гэрээ байгуулж эхний 300 мянган хувцас авсан мэдээтэй байна.

Манай улсын хувьд ажиглалтад 1,229 хүн байгаа бөгөөд дөрвөн хүн ажиглалтад гарсан бол дахин дөрвөн хүн ажиглалтад нэмэгдсэн байна. Ажиглалтад байгаа хавдартай долоон хүнд эмнэлгийн тусламж үйлчилгээ үзүүлсэн. Хавдартай хүмүүс COVID-19 халдварын маш өндөр эрсдэлтэй бүлэгт хамаардаг учир 35 хүнд коронавирус илрүүлэх шинжилгээ хийсэн. Шинжилгээнд хамрагдсан хүмүүсээс коронавирус илрээгүй" гэв.