Улсын онцгой комиссын Шуурхай штабаас ээлжит мэдээллээ хийлээ. 

ОБЕГ-ын дарга Т.Бадрал:

 -"Хилийн чандаас эх орондоо ирэх иргэдэд туслалцаа үзүүлэх талаар Гадаад хэргийн сайдын саналын дагуу тооцоо судалгаа хийж, Засгийн газрын хуралдаанд оруулах чиглэлийг УОК-оос Шуурхай штабад өглөө.

Замын-Үүдийн хилийн боомтын ажлын эхлүүлэх, боомт дээр ажиллах БНХАУ-ын иргэдийг тусгаарлах, тэнд нь байршуулах ажлыг эхлүүлнэ. Тэдгээр Хятад иргэд хилээр орж ирэхгүй бөгөөд хоёр улсын дундын бүсэд барилгын ажил хийнэ. Мөн ажлыг эхлэхээс өмнө БНХАУ-д болон манай улсад нийтдээ 40 хоног тусгаарлагдаж, барилгын ажлыг эхлүүлнэ.

Мөн Хан-Уул дүүрэгт баригдаж буй 300 ортой Эх, хүүхдийн эрүүл мэндийн нэгдсэн төвийг зургаадугаар сарын 1-нд хүлээж авч, эхний ээлжинд коронавирусийн тусгаарлалтад ашиглах шийдвэр гарлаа.

Хүнсний бүтээгдэхүүнийг импортоор оруулж буй тээврийн хэрэгслийг цагдаагийн машин дагаж явж, хүргэх цэгт нь хүргүүлж байгаа. Ингэж явахад цагдаагийн машин эвдрэх зэрэг хүндрэл гарч байна. 

Дөрөвдүгээр сард багтаан бүх эрүүл мэнд, УОК-ийн гишүүн байгууллагуудыг оролцуулж COVID-19 тархсан тохиолдолд хэрхэн ажиллах талаар сургууль зохион байгуулж ажиллах хэрэгтэй. Энэ сургуулийг Улаанбаатар хотод биш Сэлэнгэ, Дархан-Уул аймагт хийх нь зүйтэй.

Түүнчлэн нүүрс экспортод тээвэрлэж байгаа жолоооч 14 хоног ажиллаж 14 хоног амардаг. Ээлж нь дууссан жолооч нарыг тухайн кэмпэд нь тусгаарлах нь зөв гэж хурлаар тэмдэглэсэн. Мөн шүүхийн ажиллагаанууд тасалдсан байна. Түр хугацаагаар өнөөгийн нөхцөлтэй зохицуулах шаардлага байна.

Гадаадаас иргэдээ авах асуудлаар УОК хуралдаж, шийдвэрээ гаргадаг болсон. Өнөөдрийн хувьд тэндээс, эндээс иргэдээ татна гэсэн шийдвэр гараагүй. Зөвхөн БНХАУ-ын Эрээн хотоос 50 иргэнийг татаж авчрах шийдвэр гаргалаа. Гадаадаас ирэх гэсэн хүсэлт 8,000 дөхсөн байна. Эх орон руугаа ирэх гэж зүтгэж яваад халдвар авчих вий. Гэрийн хорионд байгаа бол түүнийгээ мөрдөж байхыг иргэддээ анхааруулж байна" гэв.

Шуурхай штабын дарга, хурандаа Б.Ууганбаяр:

-"Гэрээр тусгаарлаж байгаа ажлын хувьд нэг хүндрэл байна. Тухайлбал, хаяг дээрээ байхгүй тохиолдол гарч байна. Бид ИБЕГ-тай хамтарч ажиллаж байгаа. Иргэдийнхээ бүртгэлийг сайжруулж ажиллаж байна.

Тусгаарлах байрнаас гараад Эрдэнэтэд таван иргэн гэртээ хариагүй удсан тохиолдол гарсан. Цагдаагийн байгууллага эдгээр хүмүүст хариуцлага тооцсон. Тусгаарлах байрнаас гарсан хүмүүсийн хаяг байршлыг шат шатанд нь хорооны ажилтан, цагдпаа, нийгмийн ажилтан бүгд ажиллаж байгаа. Гэрээр тусгаарлагдаж байгаа иргэд хариуцлагатай байгаач гэж хэлмээр байна" гэв.

Мөн нийгмийн сүлжээгээр тараад байгаа "Сонгдо эмнэлэгт COVID-19 халдварын сэжигтэй тохиолдол тусгаарлагдсан" гэх мэдээлллийн талаар тодруулахад "Тус эмнэлэг дээр яг одоо энэ асуудлаар ХӨСҮТ-өөс холбогдох хүмүүс газар дээр нь ажиллаж байгаа. Албан ёсны хариу гараагүй байна. Бид мэргэжлийн байгууллагын гаргасан дүгнэлт дээр тулгуурлаж мэдээлэл өгнө” гэлээ.

Шуурхай штабын мэдээллийн үеэр МХЕГ-ын дэд дарга Г.Сугарбат тус газрас явуулсан хяналт шалгалтын үр дүнг танилцуулав.

Тухайлбал, ариутгал халдваргүйжүүлэлтэд ашиглаж байгаа бодисуудаас 99 дээж авч шинжлэхэд ариутгалын бодисын агууламж хангалтгүй зөрчлүүд илэрсэн байна. Францад үйлдвэрлэсэн бүтээгдэхүүний 55 дээжээс 23, БНХАУ-д үйлдвэрлэсэн бүтээгдэхүүнээс авсан 34 дээжээс дөрөв нь л шаардлага хангасан байна. Ариутгалын бүтээгдэхүүнд дэгдэмхий шинж чанар бүхий  бодисууд ордог тул хадгалалт, тээвэрлэлтийн явцад ийнхүү чанар нь алдагдсан гэж үзжээ. Тиймээс ариутгал хийхдээ орцыг нь нэмэгдүүлэхийг зөвлөлөө. 

Мөн гар ариутгах бодис үйлдвэрлэж байгаа аж ахуйн нэгжүүдэд хийсэн шалгалтад нийслэлийн зургаан дүүрэг дэх 18 ААН хамрагдсанаас 14 нь үйлдвэрлэх тусгай зөвшөөрлөө ЭМЯ-наас аваагүй байсан нь илэрчээ. Гар ариутгагч бодисын гол найрлага нь 96 хувийн хүнсний спирт. Гэтэл "Нахиа импекс", "Монос" компани техникийн спиртээр гар ариутгагч хийсэн зөрчил гарсан талаар мэдээллээ. Зөрчил гаргасан ААН-үүдэд стандартын дагуу ажиллах шаардлага хүргүүлсэн байна. 

Түүнчлэн МХЕГ-аас Улаанбаатар хотын цэвэрлэх байгууламжуудад хяналт шалгалт хийж эхэлсэн гэв.