Коронавирусийн тархалтын нөхцөл байдлын талаар ЭМЯ ээлжит мэдээллээ /2020.04.11/ хийлээ. 

ХӨСҮТ-ийн захирал Д.Нямхүү:

-2020 оны дөрөвдүгээр сарын 10-ны өдөр улсын хэмжээнд сэжигтэй тохиолдол бүртгэгдээгүй. Өчигдрийн байдлаар нийт 371 хүнд шинжилгээ хийхэд бүгдэд нь коронавирус илрээгүй. Үүнд Сэлэнгэ аймагт батлагдсан тохиолдолтой хилээр орж ирсэн 265 хүн хамрагдсан.

Тэдгээрээс Дархан-Уул аймагт 34, Орхон аймагт 43 хүн очсон байсан бөгөөд бид мөн тандалтын шугамаар 23 хүнд шинжилгээ хийсэн. Бүгдэд нь коронавирус илрээгүй.

Түүнчлэн ХӨСҮТ-д тусгаарлагдсан зургаан хүнээс давтан шинжилгээ авахад коронавирус илрээгүй. Өнөөдрийн байдлаар ХӨСҮТ-д 203 хүн  тусгаарлалтад байна.

Өвчтөнүүдийн биеийн байдлаар сайн байгаа бөгөөд бид эмчилгээний үр дүнг томографаар хянаж, бусад шаардлагатай давтан шинжилгээнүүдийг авч хянаж байна.

Хамгийн гол нь бид анхаарлаа сулруулж болохгүй. Иргэд дулаан орсон гэх шалтгаанаар амны хаалт зүүхгүй байгаа нь том алдаа. 

Тиймээс амны хаалтаа сайн зүүх, гартаа бээлий өмсөж, гараа байнга ариутгах нь чухал.

Тархалтын хоёр, гурав дахь давалгаа Европоос Ази руу зөөвөрлөгдөх магадлал өндөр байна

Эрүүл мэндийн яамны хэлтсийн дарга Д.Нарангэрэл:

-"Өвчлөл АНУ, Герман, Франц, Их Британи, Турк улсад голомтлон тархсаар байна.

Япон улс улсад 582 шинэ тохиолдол бүртгэгдснээс 189 нь Токио хотод бүртгэгдээд байна. Үүнийг судлаачид улирлын томуутай хавсарч байгаа нь өвчлүүлэх шалтгаан болж байна гэж үзэж байна.

БНСУ-д шинээр 30 тохиолдол бүртгэгдсэн бөгөөд сүүлийн үед залуусын дунд ихээр бүртгэгдэх болжээ.

Түүнчлэн ОХУ-д өвчлөл өндөр байгаа бөгөөд нийт 1,700 гаруй хүн шинээр халдвар авч, нийт тохиолдлын тоо 11,917 болоод байна. Мөн Улаан-Үд хотод өвчлөл нэлээд эрчтэй байгаа юм. Тус хотод 64 хүн шинээр өвчилж 12 хүн эдгэрсэн бол нэг хүн өвчний улмаас нас баржээ.

Өчигдрийн байдлаар мөн ОХУ-ын Тува улсад нэг шинэ тохиолдол бүртгэгдсэн.

БНХАУ-ын хувьд шинээр 42 тохиолдол бүртгэгдсэн нь гаднаас зөөвөрлөгдсөн байна. Иймд Азийн орнуудад Европын орнуудаас хоёр, гурав дахь давалгаа болж өвчний тохиолдол зөөвөрлөгдөн орж ирэх магадлал өндөр байгааг Хонг Конгийн судлаачид анхааруулж байна.

Харин манай улсад COVID-19 халдварын зөөвөрлөнгдсөн 16 тохиолдол бүртгэгдсэн. Үүнээс одоогоор 4 нь эдгэрсэн бол 12 хүн ХӨСҮТ-д эмчлэгдэж байна.

Өчигдрийн байдлаар улсын хэмжээнд сэжигтэй тохиолдол бүртгэгдээгүй. Ажиглалтад нийт 1,425 хүн байна. Эмнэлгийн тусламж үйлчилгээ хэвийн явагдаж байна.