Монгол улс тусгай хүндэтгэн үзэх шалтгаантай иргэдээ эх оронд нь авчирсаар байна. 

Энэ сард Монголоос шууд нислэгтэй чиглэлүүдэд тусгай үүргийн онгоцоор дөрвөн удаагийн нислэг хийж Москва, Истанбул, Сөүл, Токиогоос 1000 орчим иргэнээ татаад байгаа. 

Тусгай үүргийн нислэгээр зайлшгүй шаардлагатай бага насны хүүхэдтэй хүмүүс, жирэмсэн эмэгтэйчүүд, өндөр настнууд, хөгжлийн бэрхшээлтэй иргэд, эрүүл мэндийн асуудалтай иргэдийг нэн түрүүнд авчирна гэж байв. Одоо ч УОК-оос уг шаардлагыг тавьж буйгаа мэдэгдсээр байгаа. 

Эхний удаад Онцгой байдлын ерөнхий газраас онгоцонд суух иргэдийн нэрсийг өөрсдийн цахим хуудсаар нээлттэй зарлаж байршуулсан ч удалгүй мэдээллээ хааж "хувь хүний нууцтай хамааралтай" хэмээн тайлбарласан билээ. Мэдээлэл хаалттай болсноор шийдвэр гаргагчдын хамаарал бүхий хүмүүс ирж байгаа гэх хардлага ч гараад байгаа.

Тусгай үүргийн нислэгээр нэр нөлөөтэй эрхмүүд, УИХ-ын гишүүдийн нэр сонсогдож эхэлсэн бөгөөд хамгийн сүүлд УОК-ийн дарга Ө.Энхтүвшингийн Э.Золбоо тусгай үүргийн онгоцоор ирсэн тухай мэдээлжээ. 

Ө.Энхтүвшингийн хүү болох Э.Золбоо энэ сарын 15-16-нд Берлин-Москва-Улаанбаатар чиглэлийн тусгай үүргийн нислэгээр Монголд ирсэн гэх мэдээллийг эх сурвалж өгсөн байна.

Өөрөөр хэлбэл, тусгай үүргийн онгоцоор ирж байгаа иргэдийн мэдээллийг хаалттай болгосноор тусгай үүргийн онгоцны зорчигч бүрдүүлэлт эхний тавьсан зорилгодоо ниийцэхгүй, зайлшгүй шаардлагатай иргэдээ авчирч чадаж байна уу гэдэг шүүмжлэлийг иргэдийн зүгээс тавьж байна.

Харин Улсын Онцгой Комиссын дарга Ө.Энхтүвшин энэ асуудлаар тайлбар хийгээгүй байна.