Иргэдийн санхүүгийн тогтвортой байдлын хангах үүднээс хэрэглээний зээлийн эргэн төлөлтийг 90 хоногийн хугацаагаар хойшлуулах санал гаргасныг Засгийн газрын гуравдугаар сарын 18-ны ээлжит хуралдаанаар хэлэлцэж, дэмжсэн шийдвэр гаргасан билээ.

Мөн Монгол банкнаас "Зээлдэгчид хүндрэл гарвал банктайгаа холбогдон төлбөр хойшлуулах, гэрээнд өөрчлөлт оруулах хүсэлт гаргаж болно" гэж мэдэгдсэн. 

Уг шийдвэрийн дагуу арилжааны банканд зээлтэй иргэд зээлийн эргэн төлөлтөө хойшлуулахаар хандахад "Санхүүгийн хүндрэлд орсноо батлах ёстой" гэсэн шаардлага тавьж байгаа талаар иргэд мэдээлж байна.

Тэгвэл энэ талаар Монголбанкны хэвлэлийн төлөөлөгч тайлбар өглөө.

Монгол банк: "СOVID-19-ийн хөл хорионоос үүдэлтэй зээлийн эргэн төлөлтөө гэрээнд заасан хугацаандаа төлж чадахгүй нөхцөл байдалд орсон зайлшгүй шалтгаантай иргэдийг Зээлийн мэдээллийн сангийн хугацаа хэтэрсэн ангилалд орохгүй байх боломжийг 15 хоног байсныг 90 хоногоор сунган өгсөн шийдвэрийг гаргасан нь зээлтэй хүн болгонд хамаарагдах арга хэмжээ биш юм.

Хэрвээ таны орлого тасалдаагүй хэвийн бол зээлийн гэрээнд заасан үүргээ хангаж, цаг хугацаандаа зээлээ төлөх шаардлагатай юм. Зээл авсан банканд зээлдэгчийн мэдээлэл дэлгэрэнгүй байгаа учраас банк орлого нь хэвийн, хэвийн бус гэдгийг нь асуудалгүй тодорхойлох боломжтой байдаг. Тиймээс энэ шийдвэрийг зээлдэгч нэг бүрт олгож байгаа боломж гэж ойлгож болохгүй юм. Өөртөө хэт их өрийн дарамт үүсгэхгүйгээр зээлээ боломжоороо төлөөд явах нь цаашдаа дарамт багатай" гэсэн байна.