Шинэ коронавирусын халдварын улмаас Монгол Улс агаарын хилээ хааж, гадаадад сурч байгаа оюутнууд болон иргэдээ хүлээж авахын тулд Цагааннуур, Албанбулагийн боомтыг нээлттэй үлдээсэн билээ.
Гэвч гадаад улсаас эх орондоо ирсэн иргэдийн дундаас шинэ коронавирусын халдвар илэрсэн болон хилийн боомтуудаар орж ирж байгаа иргэдийн тоо нэмэгдэж байгаа зэргээс шалтгаалан Цагааннуур, Алтанбулагийн боомтыг шат дараатай хаах шийдвэрийг Улсын онцгой комиссоос гаргаад байгаа.
Тодруулбал, өнөөдөр буюу 23-ны оройн 21.00 цагаас Цагааннуур боомтыг, 28-ны бямба гаригт өглөө 06.00 цагаас Алтанбулаг боомтыг хаах юм.
Цагааннуурын боомтоор өнөөдөр 13 оюутан орж ирэхээр мэдүүлсэн бөгөөд оюутнуудыг нэвтрүүлсний дараа тус боомтоор зорчигч авахгүй болохыг Гаалийн ерөнхий газраас мэдэгдлээ. Харин ачаа тээвэрлэлт хэвийн явагдана.
