Сүүлийн 24 цагийн мэдээллээр коронавирусийн Хятадын Хубэй мужид нийт 1693 халдварын тохиолдол шинээр бүртгэгдэж, 132 өвчтөн нас баржээ.

Өнөөдрийн байдлаар зөвхөн Хятадад илэрсэн нийт халдварын тохиолдол 74129, нас барсан хүний тоо 2,000 болж байна.

Дэлхий даяар халдварын нийт тохиолдол 75122, нас барсан хүний тоо 2005 болжээ. Харин халдвар авсны дараа эдгэрсэн хүний тоо 12624 болсон байна. 

Хятадаас гадна тус вирусийн халдвараар нас барсан таван тохиолдол одоогоор Хонг Конг, Япон, Филиппин, Франц, Тайваньд бүртгэгдээд байна.

Манай улсад коронавирусийн халдвар бүртгэгдээгүй байна. Өнөөдөр сэжигтэй таван тохиолдлын хариу сөрөг гарсан талаар ХӨСҮТ-ийн захирал Д.Нямхүү мэдээлсэн юм. 

Тэрээр "Хоёрдугаар сарын 17-нд ХӨСҮТ-д гурав, Говьсүмбэр аймагт хоёр иргэнийг тусгаарлаж шинжилгээ авсан бөгөөд таван хариу сөрөг буюу халдваргүй гарсан. Өчигдөр буюу 18-нд сэжигтэй тохиолдол бүртгэгдээгүй. Өнөөдрийн байдлаар тусгаарласан сэжигтэй тохиолдол байхгүй байна" гэж мэдэгдлээ. 

Харин иргэдийн дунд хардалт болоод байгаа оношлуурын баталгаатай эсэх талаар ЭМЯ-ны Эм үйлдвэрлэл, технологийн газрын мэргэжилтэн А.Баярзаяа мэдээлэл өгөв. 

Тэрээр "ХӨСҮТ-ийн вирус судлалын лаборатори нь амьсгалын замын цочмог халдвар үүсгэгчийг илрүүлэх тоног төхөөрөмж, урвалж, оношлууртай, мөн мэргэжлийн боловсон хүчин хангалттай байна.

ХӨСҮТ-ийн вирус судлалын лаборатори ДЭМБ-ын сүлжээ лаборатори болохынхоо хувьд Японы халдварт өвчин судлалын төвийн лавлагаа лабораториос оношлуур хүлээн авч, шинжилгээ хийж байна. Манай орон Ази тивдээ хамгийн түрүүнд оношлуур хүлээж авсан.

Оношлуурыг 100 хувь найдвартай гэж үзэж байгаа. ХӨСҮТ-ийн лаборатори Токиогийнхтой яг адил тоног төхөөрөмж, урвалж, оношлуур хэрэглэж байгаа" гэлээ.

Дэлхийн Эрүүл Мэндийн Байгууллагын мэргэжилтнүүд гамшгийн нөхцөл байдалтай танилцаж, зөвлөгөө өгөхөөр Ухань хотод очго гэж ДЭМБ-ын ерөнхий захирал Тедрос Адханом Гебрейесус өчигдөр мэдээлжээ.

Халдварын гол эх үүсвэр хэмээн тооцогдож буй Ухань хотод коронавирусээр халдварласан хүний тоо 44 мянгыг давсан бол халдварын тоогоор Сяогань болон Хуанган муж хоёр болон гуравдугаар жагсаж байна. 

Даваа гаригт /2020.02.17-2020.02.18/ 1807 хүн шинээр халдвар авч, 93 өвчтөн нас барсан.

Ням гаригт /2020.02.16-2020.02.17/ 1933 хүн шинээр халдвар авч, 100 хүн нас барсан.

Бямба гаригт /2020.02.15-2020.02.16/ 1843 хүн шинээр халдвар авч, 139 өвчтөн нас барсан.