Шинэ төрлийн коронавирусийн болсон Хубэй мужид сүүлийн 24 цагийн дотор 1933 хүн шинээр халдвар авч, 100 хүн нас барсан тухай мэдээллээ.

Өнөөдрийн байдлаар Хятад даяар халдвар авсан хүний тоо 70445, нас барсан хүний тоо 1765 болжээ.

Шинээр илэрсэн халдварын тоо пүрэв гаригаас хойш буурч байсан ч дахин өсөх хандлагатай байна. Хубэй мужид шинээр илэрсэн халдварын 90 орчим хувь нь Ухань хотод бүртгэгдсэн байна.

Мөн Хубэй мужид өчигдөр буюу ням гаригаас эхлэн хөл хорионы хатуу дэглэм хэрэгжиж эхэлсэн байна. Энэ нь Ухань хот болон түүний ойр орчмын 200 орчим суурин газрын нийт 24 сая хүнд үйлчилж байгаа аж. 

Шинэ дэглэмд хамрагдсан бүх тосгон суурингууд зөвхөн ганц гарцаар иргэдийг оруулж, гаргаж байхаар болжээ. Мөн гаднаас хүн нэвтрүүлэхгүй, нэг өрхөөс нэг л хүн гурван өдөр тутамд зайлшгүй шаардлагатай хүнс, ахуйн бараа худалдаж авахыг нь зөвшөөрсөн байна. Түүнчлэн, олон нийтийн арга хэмжээ, хурим, найр зэргийг хориглож, оршуулгын ёслолыг цомхон хүрээнд гүйцэтгэж байх журам гарчээ.

Дэлхий даяар халдвар авсан хүний тоо 71223, нас барсан өвчтөний тоо 1770 болсон байна. Харин халдвар авсны дараа бүрэн эдгэрсэн хүний тоог 10607 болсон гэж Хятадын үндэсний эрүүл мэндийн хорооноос мэдээлжээ. 

Коронавирусийн халдвар өнөө өглөөний байдлаар Хятадаас гадна нийт 780 тохиолдол бүртгэгдээд байна. 

Тэдгээрээс Японд хамгийн олон буюу 414 тохиолдол бүртгэгдсэн бол Сингапурт 75, Хонконгт 57, Тайландад 34, БНСУ-д 29, Малайзад 22, Тайваньд 20, Герман 4, Вьетнамд 16,  Австрали, АНУ-д 15, Францад 12 тохиолдол тус тус бүртгэгджээ. 

Мөн Макао, Их Британи, АНЭУ, Канад, Энэтхэг, Филиппин, Италид, ОХУ, Испани, Балба, Бельги,  Камбож, Финланд, Швед, Шри Ланка, Египетэд бүртгэгдээд байгаа юм. 

Хятадаас гадна коронавирусын халдварын улмаас Филиппин, Хонконг, Япон, Франц, Тайваньд тус тус 1 хүн нас баржээ.